Lyngba kane ka Football Tournament ka KSU Umsning Circle ka la lah ban pynmih pisa ha ka ban thied ia ka kali ambulance ka ban lah ban ai jingshakri ia ki paidbah khamtam eh ia kito kiba duna ha ka ioh ka kot.

Ha kane ka lympung plie bad pyllait paidbah ia ka ambulance jong ka seng ia ka bynta kum u Kongsan la shim da u Samla Donald V .Thabah u ba dei u General Secretary jong ka KSU Central Executive Council bad u Samla Ferdynald K Kharkamni uba dei u President KSU NKHD Unit kum u Symbud Kongsan , ha ka jing iasynran lang ki nongialam jong ka seng naduh u Samla Eric Nongkynrih u Sports and Cultural Secretary jong ka KSU Sengkmie, u Samla James Hitler Mawphniang u Legal Affairs Secretary KSU CEC . La wan ruh ban sakhi ia kane ka lympung da ki riew rangbah jong ka dong bad ka thain Umsning naduh i Bah Rocky Kylla, Chairman jong ka Umsning Town Durbar, Bah Rocky Marwein Rangbah Shnong jong ka Umsning Proper B, Bah Don Sumer bad Bah Anthony Sumer bad ha kane ka prokram lah bynta ia ka kam shongknor sha u General Secretary KSU Umsning Circle, u Samla  Laraplang Nongbri.

Haba ai jingkren na ka liang jong u Samla Donald V .Thabah u la bnoh lang ia ar tylli ki jing iadei ha kane ka lympung, kawei ka dei ka jingpyllait paitbah ia ka ambulance bad kawei ka dei ka sngi ha kaba u samla Biswal Paul Makri u la len la ka jingim na ka bynta ka dawbah jong ka Ri bad ka Jaitbynriew, u la ong ba ka jingplie ambulance kaba nyngkong ka jong ka seng ka dei jong ka Sohra Circle kaba ki la khot ka Samaritan on Wheels kaba ka la ai ka jingshakri kaba paka ia kiba duk bad kum ka seng ka don haduh 15 tylli ki ambulance bad kawei ka mortuary van bad kine ki ambulance ki la shakri ia bun ki longiing kiba duna ha ka ioh ka kot u la pynkynmaw ruh ha u snem 2020 haba don ka covid 19 ba lyngba ki ambulance jong ka seng ka la tyrwa ruh ha ka tnat ka koit ka khiah jong ka Jylla ban pyndonkam bad pyniarap ha kato ka por jong ka  jingeh. Na ka liang jong u Samla Donald V Thabah u la kyntu ruh ia ki dkhot jong ka KSU Umsning Circle ba ki dei ban sumar bha ia ki ambulance khnang ba kin lah ban shakri bun bun snem ia ki paidbah ba bun ba lang. 

Kumban kyrtiang dien pat ha u 1987 ha ka 17 tarik jylliew ka sngi kaba u samla Biswal Paul Makri bam kwai ha dwar u Blei u la len la ka jingim ha ki kuli jong ki pulit CRPF ha ka jingiakhih Anti Foreigners' Movement pyrshah ia ki khar nepali bad kane ka jingjia ka la pyn bitar ia ka seng ha kaba ka KSU ka la pynjur ia ki jingiakhih tad haduh ban pynlong ia kine ki dkhar ba kin phet krad na kane ka Ri ka ba ieid ka jong ngi bad ka jing len lade ia la ka jingim jong u Biswal Paul Makri kam shym la long leh noh ei hynrei ka snam ka jong une u samla ka ud haduh kine ki sngi ha ki dkhot jong ka seng.

Na ka liang jong ka KSU Umsning Circle ruh lyngba u President u Samla Lester Nongbet u la pynpaw ia ka jingsngew nguh ia baroh kiba la noh synniang ia ka seng khnang ba ka jingthmu jong ka seng ha ka ban thied ia ka kali Ambulance kan long kaba jop khamtam eh ia ki  paidbah byllien kiba la kyrshan tylli tyllan ia ka seng haba iadei bad ka jing wan sakhi jong ki ia ka Football Tournament da kaba ki siew ia ki bai rung ka ba long ka jingnoh synniang ka ba heh bad ka ba kongsan bha.