Hadien ka jingleit kynduh, U Samla Ferdinald Kharkamni u la ong, “Ka jingïalang ka long kaba seisoh bad kaba dap da ka jingsngewthuh jingmut. Ngi la wanrah ïa ki jingdawa jong ngi na ka bynta ka bha ka miat jong ki samla pule, khamtam kito kiba wan na ki longïing kiba duk. Ngi kwah ban peit ba kim dei ban shah kyntait ban rung sha ki jing pule kiba kyrpang kum ka MBBS bad kiwei ki rukom pule ba kham khraw.”Ha kane ka jingïathir, ka Seng ka la kyntu jur ïa ka bor pynïaid jong ka USTM ba kin bishar bniah halor ka jingai ka jingïoh rung (seat) ha ka MBBS ha ka PA Sangma International Medical College and Hospital na bynta ki samla pule na ka jylla Meghalaya, khamtam eh ïa ki samla Khasi.“Ka jylla jong ngi ka donkam shikatdei ïa ki lad ai jinghikai ha ka liang ka medical. Ka dei ka hok ba ki samla jong ngi kin ioh jingïoh ban pule ha USTM kaba don hapoh ka jylla jong ngi hi,” la ong U Samla Ferdinald.

Ka KSU-NKHD ka la kyntu ruh ïa ka USTM ba kan pynshlur bad ai jingkyrshan lyngba ki scholarship na bynta ki samla pule kiba wan na ki longïing kiba duk, na bynta ki kyrdan Under Graduate (UG) bad Post Graduate (PG), khnang ba kin lah ban bteng ïa ka jingpule sha khmat khlem jingeh.

Ka Seng ka la pynpaw ruh ïa ka jingsngewkhia halor ki khubor lamler na ki lad pathai khubor na Assam kiba kynnoh ba ka jingshlei um ki surok ha Assam kadei namar ka jingdon jong ka USTM. U Samla Ferdinald Kharkamni u la bynrap ruh, “Ngi pynrem jur ïa kine ki jingshah kynnoh khlem nongrim bad ngi dawa ba kane ka jingthoh khubor bakla kan kut noh. Ym dei ban pyndonkam ïa ki skul ba ai jinghikai kum ki nongphikir ha ki kam sain pyrthei.”Shuh shuh, ka Seng ka la kyrpad ruh ïa ka USTM ba kan ai lad ïa ki samla Khasi ba pule ha katei ka Skulbahban trei part-time hapoh ka university katkum ka bynta jong ka course ba ki pule, ban ïoh jingmyntoi ha ka jingpule ryngkat ka jingshim jingtbit bad jingkyrshan pisa.“Bun na ki samla pule Khasi ki wan na ki longïing kiba khlem da biang ka ïoh ka kot. Ka lad ban trei part-time ha ki kam ba ïadei bad ka course kan iarap shikatdei ïa ki ban im bad ban pynshlur ïa ka jingpule,” la bynrap u Bah Kharkamni.Ha kaba khadduh, ka Seng ka la kyntu ba kane ka Skulbah ba kan pyndonkam da ki Jain Ryndia (Eri Silk), kiba long ki jaintynrai u Khasi, ha ki Jingialang bad haba ai sngewbha sha ki briew kiba wan ban jngoh ia kane ka skulbah, kum shibynta ban kyrshan ïa ki nongthain ryndia na Ri-Bhoi District.“Ka Ryndia ka dei ka jain kaba kham long kyrpang jong ka jaidbynriew Khasi. Ka jingpyndonkam ïa ka ha ki prokram kan wanrah ïa ka jingpynneh pynsah ia ka kolshor tynrai U Khasi. Kane ruh kan kyrshan shikatdei ïa ki nongbylla ha kane ka kam thain jain” la ong u President jong ka KSU-NKHD.U Chancellor jong ka USTM u la pdiang sngewbha ïa ki jingdawa ba la wanrah da ka Seng bad u la pynpaw ïa ka jingsngew kmen ban ïatreilang ha la ka bynta ban kyrshan ïa ki samla pule na ka jylla, ha ka liang ka pule, ka jingpynneh pynsah ia ka riti dustur U Khasi.

Ka Khasi Students’ Union, North Khasi Hills District Unit ka kyntu ban don ka jingïatreilang ba jan bad kane ka Skul Bah na bynta ka jingmyntoi ki Samla Pule ka Jaitbynriew.