La ioh ban pynhap pyrda ia ka 1st Maitshaphrang Knockout Football Tournament 2022 ba la pyniaid da ka KSU Syad Unit da u Samla Rangbah Eric Nongkynrih uba dei u Assistant General Secretary KSU CEC kum u kongsan bad Peterson kylla uba dei u Adviser KSU Umsning Circle bad u ba long ruh u President ka Umsning socio & cultural sports club Umsning kum u symbud kongsan mynta ka sngi ka 12 tarik Naiwieng 2022 ha madan shnong Syadheh.

Kane ka jing lehkai ka la long kaba itynnad ha kaba baroh artylli ki team ki la trei shitom bad ki la sei la ki sap ki phong kaba ki don ban thep ia ka bol sha poh goal, bad ki la ioh thep mar shi goal ha kapoh ka jinglehkai kumta namar ba la kut ka por bala buh la hap ban shu shut da ka tie breaker bad ka umsawkhwan FC ka la ioh ia ka nam lahduh.

 Ha kane ka jing ia lehkai ka Umsawkhwan FC ka la ioh ia ka nam jingjop ryngkat ka song pisa kaba 30,000 tyngka bad ki trophy pyrshah ia ka Mawlong sawmill FC kaba la ioh rah ia ka song pisa kaba 15000 tyngka bad ki trophy. 

Ia ka best player la rah da u samla Iaryngkat Kharkrang, ka nam Best goal keeper la rah da u samla Abetnijo Lymphuid bad ia ka nam top scorer la rah da u Samla F Nongkseh kiba dei ki rangialehkai ka Umsawkhwan FC.

La ia don bynta lang ruh ki nongialam shnong naduh ki rangbah shnong bad secretary shnong ryngkat ka EC shnong Jong ka Syadheh bad syadrit. Na ka Liang ki nongialam shnong ki la pynpaw ruh ba ki kloi ban ia trei lang bad ka KSU ban rat dieng khong ia ki jingdih basniew kum u drugs khnang ban wanrah ia ka shong suk shongsaiñ hapoh shnong poh thaw bad ki kyntu kynpham ruh ba ki dei ban nang iai trei shit rhem khlem kyrtian dien ia ki jing tynjuh ba ki kynduh ha ka jing iaid lynti.

La ioh ruh ka jing kren na ka Liang u Samla Eric nongkynrih bad u la kyntu kynpham ruh ia ki rang ia lehkai ba ki dei ban trei shitom ban poi sha ka thong ha kino kino ki kam ba ki thmu bad u la pynpaw ruh ba ka jaitbynriew khasi ki la long kiba paw ha ba bun ki liang khamtam ha kaba iadei bad ki sports.

Haba phai shaphang ka football, u Adviser ka KSU Umsning CIRCLE u la ong ba ka unit syad kadei kawei na ki unit kaba khih ksar bha bad ka juh iai mih shakhmat ban shakri ia ka shnong ka thaw hapdeng ki Jing eh jing jynjar kaba ki paitbah ki kynduh ha ha bun ki liang. Haba wai ka jing ialang na ka Liang u President u la pynpaw ka jing ai khublei ia baroh ki para nongialam naduh ki nongialam ka KSU syad unit, KSU umsning CIRCLE, KSU NKHD bad KSU CEC, bad u la pynpaw ruh ka jing ai khublei ia ki nongialam shnong bad ia ki paitbah ka shnong syad hi baroh kawei.