Kyntu jur ia ka sorkar ban pyntreikam noh kham kloi ia ki aiñ ki ban pyrkhing ia ka jingwan rung laitlait ki briew kiba shapoh ka jylla.

Ki dkhot ka Khasi Students' Union (KSU) Umsning Circle ha ka nohphai sngi jong ka 12 tarik u Lber 2023 ki lah ioh ban bat ia 90 ngut ki briew kiba wan na shabar ka jylla kiba wan rung tuh na ki khappud ka Jaintia Hills District.

Ka jingioh bat noh ka KSU Umsning Circle ia ki tei ki briew ki bym tip la ki dei na ki wan na ki jylla ka ri India ne Bangladesh ka dei hadien ba lah don ki riew paidbah kiba lah ai jingtip balah don haduh artylli ki bus kiba don ia u number AS-01 GC 7338 bad AS-01 KC 5638 kiba lah kit da smam ia ki briew kiba dei na shabar ka jylla Meghalaya, kumta lyngba ka jingtrei shitom ki dkhot ka seng lah ioh pynap shrip noh ha Umsning ia kitei ki bus bad hadien ba lah kylli phyrthew bha ka seng ka lah lap ba kim don satia ia ki kot ki sla kiba pynshisha ba ki dei ki nong India bad ki don ruh haduh 90 ngut eieii, kumta ka seng ka aiti ha ki pulit ka Thanat Umsning, Ribhoi.

Halor ka jingioh rung laitlait ki briew kiba wan na shabar ka jylla, Ka KSU ka kyntu jur ia ka sorkar jylla bad ka sorkar pdeng ba kin pynkhlaiñ ia ki aiñ ban pyrkhing ia ki bar jylla khnang ban khanglad ia ki riewsniew kiba shim kabu ban rung tuh shapoh ka jylla, shuh shuh ka seng ka lah pynpaw ia ka jing sngew lyngngoh ba wat hapoh Infiltration check gate ki nongtrei kim da pyrkhing hynrei ki tei ki bar jylla ki la iathuh ban ba ki siew tang 4000/ tyngka bad ki la ioh lad ban rung laitlan bad poi shaduh Umsning.

Ka jingiai kuman jong ka sorkar jylla ban pyntreikam ia ki ain ki ban pyrkhing ia ka jingrung laitluit ki briew kiba na khappud Assam bad Bangladesh ka jylla ka pynshlur ia ki ban wan thaw ktem hapoh ka jylla jongngi ban leh ia ki kam lute, kam tuh, kam khaïi drok bad kiwei ki kam runar kiba lah ban shim ia ka jingim ki briew kiba luilui kiba don hapoh ka jylla jongngi.

Halor kane ka bynta, ka seng KSU kan pynpaw sha ka sorkar ba kan iai pyndep ia ka sienjam ban khynra ia ki briew kiba wan na shabar laitnoh kiba wan jngohkai pyrthei, katba ym pat ioh ia ki aiñ kiba biang. Ka seng ka buh jing maham tyngeh ruh ia ki briew kiba wan rah ia ki nong trei jylla ki bym don ki ki kot ki sla ki ba biang namar ka ktah ia ka suk ka saiñ ka jylla kumba ngi lah sakhi na ka por sha ka por bad ka dei ruh ka jing pynkheiñ ia ka Aiñ Inter-state Migrants Workmen (Regulations of Employment and Conditions of Service) Act 2011 jong ka jylla Meghalaya.