Halor ka jingmih ha ki katto katne ki lad pathai khubor ha kaba la paw ba ka North East Frontier Railways (NFR) ka thmu ban survey biang sha ki thain Jaintia hills na bynta ka lynti railway bad pynkloi noh ïa ka jingshna ïa ka lynti rel ha Jaintia Hills, ka seng lyngba ka Ka KSU East bad West Jaintia Hills District unit lyngba ka kyrwoh ka phah khubor sha ka NFR ba ynnai tynruh bad ynnai ai ding halor ka lynti rel,namar ngi long kiba la pynkhreh ban tyngkhuh lada leh da kabor.

Shuh shuh kane ka kyrwoh ka ong ba ka jingkwah khah khah ka NFR ban wanrah ïa ka lynti sha kine ki thaiñ ka la poi haduh u pud ba kam kheiñ snep shuh ïa ki Autonomous District Council (JHADC) kaba ka dei ban kynjoh ktien ban ioh ïa ka No Objection Certificate (NOC) ban ïaid shakhmat ha kaba ïadei bad ka jingpyntrei ïa ka lynti rel. Shuh shuh ka jingthmu ka NFR ban survey biang iaka lynti rel sa sha Jaintia Hills kam kheiñ snep ruh wat ïa ka rai jong ka sorkar jylla. 

Halor kine kiei kiei baroh , ka KSU ka maham ïa ka NFR ba kam dei ban leh tam bad da lei lei,ngin  ym ailad ïa ka jingpyntrei ïa ka lynti rel ba kan ïaid sha khmat wat lada ka sorkar ka thom biang da ka bor kumba ka la jia ha kine ki khyndiat bnai kiba la dep. 

Ka seng ka dawa ïa ka Jaiñtia Hills Autonomous District Council (JHADC) ba kam dei satia ban ai No objection Certificate (NoC) sha ka North-East Frontier Railway (NFR) ne sha ka Sorkar ban pynpoi ïa ka lynti Rel ha ki bynta jong ka Jaintia Hills, katba ka Sorkar kam pat lah ban wanrah ïa ki aiñ kiba khlaiñ kiba ïada na ka jingwan tuid kyrthep ki poi ei hapoh ka bri u Hynñiew trep.

Kane ka jingpyrshah jong ka seng ka long hadien ba la mih haki lad pathai khubor ba ka North East Railway Frontier  ka don jingthmu biang ban survey iaka lynti shna rel na Bhoksong, Rajagaon, Baithalangso, Jengkha, Kherani,bad Umrangso ka ban kut ha  Jowai ..

“Ka jingthmu jong ka seng ban pynsngew sha ka Jaiñtia Hills Autonomous District Council ka long halor ka nongrim ban kyntu ïa ka Council hi baroh kawei ba kan pyrkhat rangbah bad ban ym ai NoC ïa ka NFR kaba dei ban khmih ïa kane ka projek. Ka seng ka ban jur ïa ka District Council kaba long ka stieh ïada jong ka jaidbynriew ba kan da pyrkhat sani bha halor kane ban nym ai satia ïa ka NoC. Ka seng ka khmihlynti ba ki nongïalam bad ki nongmihkhmat jong ka JHADC kin dei ban don kajuh ka sur halor ka lynti Rel,’ 

Ka seng kan sa aiti ruh da ka jingthoh sha ka Sorkar lyngba u Deputy Commisisoner ban pynpaw ïa ka jingpyrshah jong ka seng ban pynpoi ïa ka lynti Rel ha Jaiñtia Hills District.

“Ka seng ka iengskhem halor kane ka mat katba ym pat don ki aiñ kiba khlaiñ ban ïada ïa ngi kum ka jaidbynriew ritpaid, ai ba ka jingïakren halor ka lynti Rel kan sangeh shwa. Ka seng, naduh u snem 1988 ka la pyrshah ïa kane ka jingthmu jong ka Sorkar ban iuhroit ïa ka jaidbynriew bad kan ïai pyrshah katba ka Sorkar kam pat pyrkhat thymmai ban wanrah ïa ki aiñ kiba khlaiñ ban ïada ïa ngi,” ong ka kyrwoh

“Kum ban shu pynkynmaw, ka Sorkar ka la pyrshang ban pyntrei ïa kane ka project na Tetelia sha Byrnihat hynrei ka seng ka la pynpulom ïa kane ka jingthmu da kaba pyrshah jur bad pynsangeh ïa kane ka projek ha u snem 2017”.

Ka seng ka kyrpad bad wer ruh ïa ki Dorbar Shnong, ïa ki paidbah bad khamtam ïa ki MLA bad MP ba kin ïatreilang halor kane ka kam bad bynrap ruh ba ka seng kan nang ïai buddien ïa kane ka kam bad shim ruh ki lad ki lynti ban pynshai sha u paidbah halor ka jingma kiba ap lada wan ka lynti Rel.

Ka seng ka sngew ban pynpaw ruh sha ka Sorkar ba kam dei ban im sngi tang ïa ka lynti Rel hynrei to pynleit jingmut bad pynurlong ban wanrah shwa ïa ka roi ka par sha ki paidbah ka thaiñ naduh ka surok, ka koit ka khiah, ka pule ka dangle bad kumta ter ter,” la bynrap u kyrwoh na ka seng.

Ki shnat ka seng baroh artylli ki la pynpaw ïa ka jingpyrshah ban wanrah ïa ka lynti Rel namarba ka seng kam kwah ba ka Jaiñtia Hills District kan long ka khyrdop ïa ki mynder ri kumba la jia ha ka jylla Assam kaba bun ki mynder ri kiba rung ba mih lyngba ka Assam kumba long ka Karimganj.

Ngi la kren shai ba katba ka jylla Meghalaya kam pat biang ïa ki aiñ ki ban ïada kumta ngin nym ailad ban wanrah ïa ka lynti Rel.