Nalor ka jingdon jong ki dkhot ba shitrhem ka Seng na Umsning Circle la wan ban  sakhi bad pynshit pynshngain da u President ba rangbahduh jong KSU, U Samla Rangbah Lambokstarwell Marngar, U Samla Ferdinald Kharkamni uba dei u President ka KSU NKHD Unit, U Samla James Mawphniang General Secretary ka KSU NKHD Unit, U Samla Joseph Lambok Rymbai uba dei u Vice President ka KSU NKHD Unit lem bad kiwei kiwei kynthup ia ki Nongialam shnong ka Umsning, U Bah Rocky Kylla uba dei U Chairman ka Umsning Town Dorbar, U Bah Rocky A. Marwein Rangbah Shnong Umsning Proper B, I Kong M.Kharnaior President ka Seng Kynthei Umsning pyllun ha ryngkat ki nongialam jong ka seng Kynthei Umsning Pyllun bad kiwei kiwei bad kaba kham nangioh mynsiem bad pynshlur shuh shuh iaki Heprit ialehkai ka dei ka jingwan sakhi jong u Bah Aiborlang

 Khongjee uba dei u rangialehkai football ba bna nam ka jylla uba la ioh iaka lad ban leit iashimbynta sha ki lympung ialehkai ba heh haka ri India kum ka ISL , I-League bad uba la mih khmat ia ka Ri India ha kane ka kynti ba mynta u dei ruh u Head Coach jong ka Rangdajied United Football Club.

Haba phai sha ka jingialehkai, ki heprit ki la ia trei borbah ban ioh thep kol bad la lah ban iohi iaka jingtbit jong ki heprit ban ialehkai football watla ka madan kam pat da biang. Hynrei ki nongkyrshan na baroh ar tylli ki kynhun ki la kyrshan tyngeh ban  sakhi ia ka sap ka phong ka jingialehkai hynrei ha kaba kut ka kylla step ka jingialehkai ka long kaba ia khaid, haba bteng ia ka kylla miet ki Heprit ka Eastern Ri Bhoi ki la ioh ban thep da la 2 kol hynrei shwa ban kut ka jingialehkai khlem duh mynsiem ki heprit na ka Kynjoin Umran ki la thep kylla shwa ban wai ka jingialehkai, Ha kaba kut jong ka jingialehkai ki heprit jong ka Eastern Ri Bhoi FC ka la pynliem noh iaki heprit jong ka Kynjoin Umran da ar kol la shikol.

Kumban shu kdew khyndiat ba ki nongjop ha kane ka lympung ki la iohrah iaka khusnam kaba da ka song pisa kaba 40 hajar tyngka ryngkat ka trophy bad kiba wan ba-ar ki la ioh rah iaka ia ka song pisa kaba 20 hajar tyngka ryngkat ka trophy, la lah ruh ban ai iaki khusnam kiba kyrpang sha ki heprit kiba la lah ban ialehkai bha kiba kynthup ia u heprit Nangtei Mukhim uba la iohrah iaka nam Top Scorer, u heprit Ledestar Tangsang kum u Heprit ba tbit tam jong ka tournament,u heprit Emeral Sohiong kum u rangialehkai ba kynsai jong ka sngi, u heprit Mewanpynskmen Kshiar kum u nongialehkai ba khynnahduh jong ka tournament, bad iaka kynhun kaba biang tam nadong shadong la iohrah da ka kynhun ialehkai football ka Syad Lyngdoh FC.

Ki nongshah khot sngewbha haba ai jingkren ha kane ka sngi ki la pynpaw iaka jingkmen ba ki nongialam jong ka Seng KSU na Umsning Circle nalor kiwei ki kam kiba ki la mih shakhmat ban ialeh ban tei bad pynbha iaka imlang sahlang ki la shim ruh iaka sienjam ban shna pynbha biang ia kane ka madan da ka jingthmu ban pynlong iaka sor Umsning ban mih ki samla bad ki heprit ban ieid iaka kam ialehkai bad ban lait na ki jingsniew kiba bunjait kiba mih ha kane ka juk kaba mynta kaba la syrtap da ki jingsniew kiba lại phew jait lại phew rukom,shuh shuh ki Nongialam jong ka Umsning Town Dorbar lem bad ki Rangbah Shnong ka Shnong Umsning ki lah kular ruh ba da lei lei ruh kin nym ailad shuh ban pynlong jaka Parking ne ban pynlong iew ha kane ka Madan bad ban pynneh beit ia kane ka Madan kum ka Madan ialehkai na ka bynta ka lawei ba phyrnai ki Heprit bad ki Samla ka thaiñ Umsning bad kumjuh ka Bri u Hynniewtrep hi baroh kawei.