Ka Khasi Students' Union (KSU) West Khasi Hills District Unit ha ka 24tarik Jylliew 2022 ka la rakhe ia ka International Day Against Drug Abuse and Illicit Trafficking da kaba pynlong ia ka jingiaid paidbah ha ka Sor bah Nongstoin. 

Katei ka jingiaid paitbah ban pyrshah ia U Drug ka la iaid beit iaid ryntieh bad ka la long ka ba shit ba shngain ha kaba bun ki Nongshong iew, ki longkmie longkpa ki Khynnah Skul bad College ki la wan ia shim bynta shitrhem bad pynlong ia katei ka programme kaba jop. Bad hadien ba la dep iaka jingiaid paitbah la pynlong ia ka jingialang paitbah ha ka Complex Market, New Nongstoin.

Ha katei ka jingialang la wan ban ia shim bynta U MLA jong ka Nongstoin Assembly Constituency Bah Macmillan Byrsat, U Superintendent of Police ka West Khasi Hills District Bah H.G.Lyngdoh, U Additional Deputy Commissioner (ADC) Bah H. K. Thabah bad ki wei pat ki Officer jong ki department bapher bapher ki ba dei peit ia ka koit ka khiah bad ka shongsuk shong shngain jong ki kynthei khynnah. 

Haba ai jingkren naka liang jong U MLA u la pynpaw ia ka jingsngewdiaw ia kaba bun ki samla ha kine ki sngi ba mynta ki da trei shitom ban wad ia ka jingsniew hynrei kaba eh pat ban pdiang ia ka ba bha watla don ba tyrwa sngewbha. Bad u la iawer ruh ia baroh ki paid nongshong shnong jong ka thain Nongstoin ba ngin nym ap lane ban ieh tang ha kita ki ba dei peit hynrei ngin long ma ngi iwei pa iwei ngin shim ka jingkitkhlieh ban ialeh pyrshah bad rat dyngkhong ia ki jingsniew. U la kular ruh ban ai ka kti kamon ka kti kadiang ban iatreilang ban ialeh pyrshah ia ki jingsniew.