Ka Khasi Students' Union lyngba ka Education Cell hapoh ka jingialam u Samla Pynkmenlang Sanmiet Education Secretary ryngkat bad u Samla Richest Malngiang ha ka 26 Tarik Jymmang 2023 ka lah leit iakynduh ia u Secretary ka Education Department jong ka Sorkar Jylla, u Shri Ambrose Ch Marak, IAS, ha kaba lah ioh ruh ban ai iaka dorkhas halor ki mat kiba kyrkieh kiba ki samla pule ki iakynduh. Kawei na kine ki mat ka long nalor ka jing pyrkhing ia ka rukom ai application forms ha PGT College ha kaba bun spah ngut kiba kwah ban rung ha kane ka jaka pule ki lah duh lad noh ban leit namar ba kim ioh satia iaka application form. Lah sakhi ruh, ba ka jingieng ban ap laiñ na ka bynta ban ioh iaki application forms ka sdang naduh ki por 12baje shiteng synñia haduh mynstep da lah plie ophis. Bun na kiba ap ruh kim ioh satia iaki forms. Kane ka lah pynlong iaka Seng ban dawa da kaba pynkiew biang iaka number jong ki application forms na ka 500tylli la kumno kumno 1000tylli, bad ruh ban extend biang iaka tarik thep form. Na ka liang u Shri Ambrose Ch Marak, u lah kular ban shim khia bad ha khmat ki dkhot ka Seng hi u lah phone wut wut sha i Principal jong ka PGT COLLEGE ha kaba u lah bthah ba dei ban pynkiew biang iaki number jong ki application forms bad ka Seng hi ka ngeit skhem ba ka College ruh Kan leh ia kaba bha tam. Kumjuh ruh ha ka jingiakynduh pat bad i Principal jong katei ka College, na ka liang ka Seng ka lah ai jingmut iakatei ka College ban leh noh da la Online mode hakaba iadei bad ka Admission procedure bad na ka liang ka College ka shim ba kane ka jingai jingmut ka long kaba dei, bad ngeit skhem ba ha Snem ban wan, ngin sa sakhi iakane.

Ha kaba iadei bad ki Centres na ka bynta jong kito kiba hap ban thoh iaka CUET, ka Seng ka lah dawa ban pynthikna ba ki samla Khasi ki dei ban ngat beit ha Shillong. Kum ban shu pynkynmaw, halor kane ka juh ka mat, Ka Seng ka lah dep ban dawa naduh ka Snem ba lah dep ban pynthikna ba ki centres jong kito ki samla Khasi kiba thoh ia ka CUET kin hap ban dei beit hapoh Jylla jong ngi, bad kumta hi ka Sorkar ka lah leh ia kaba donkam. Kaba sngewlyngngoh pat ka long, ba mynta u Snem ruh dang bun bah ki samla Khasi ba hap thoh ia kane ka exam ki hap ban leit shaduh sha bar Jylla, te kumta hapdeng ka jingiakynduh bad u Secretary jong ka Education Department, u lah kubur ba iakito kiba dang hap leh ia kane ka exam ha kine ki taiew ban wan, kin sa hap ban thoh noh ha Shillong.

Ka mat ba khatduh ba ka Seng ka lah dawa ka long halor ka jingiatyngkhuh ki tarik thoh exams jong ka D.El.Ed bad ka B.Ed ki ban sa long ha ka 10th/06/2023, na ka liang u Secretary Department, u Shri Ambrose Ch Marak, u lah kubur ba yn sa pynkynriah noh bad ia iakane yn sa pynbna paitbah ha ki sngi ban wan.