Ka KSU lyngba ka Education Cell mynta ka 8 tarik u Nohprah 2023 ka la ioh ba kynduh ia u Myntri ba dei peit iaka tnat pule dangle u Rakkam Sangma ha iing sah jong u hapoh ka jingïalam u Samla Shelkitbok Kharbani Assistant Education Secretary KSU CEC ha ka jingïasynran lang u Samla Shiningstar Kharbihkhiew Environment secretary KSU CEC . Ha ka jingïakynduh bad jingïathir halor artylli ki mat kata ki long ka baibam (Scholarship) bad halor ka MTET na ka liang u myntri u la pynsngew ba iaka baibam Scholarship na ka liang ka fund ba dei ban ioh naka sorkar kmie kam pat poi satia haduh mynta hynrei ïa mynta ka don tang khyndiat ha ka sorkar jylla bad ïa kane ruh ka sorkar jylla ka la nang pyllait naduh mynin ka sngi, u minister u la kular ruh ha khmat ka seng ba ha une u taiew ban wan khmih lynti ba kan poi noh bad ka sorkar kan ioh noh ban pyllait lut sha baroh ki samla kiba donkam. Ka seng ka la kyntu ruh sha ka department ba dei khmih ba kum kine ki jingpynslem ïa ka scholarship kam dei shuh ban dang ïai jia ha ki snem ki ban wan. 

Halor ka kynrum kynram haba ïadei bad ka MTET Exam kaba la long ha ka 1 tarik u Nohprah 2023 na ka liang u myntri ba dei peit u la pynpaw ba ki jubab ba ki thoh kiba dei hi kin dei beit kumba ki long bad ïaka answer key ba mih bakla bad ba la pynklumar kan ym ktah ïaki. Shuh shuh u la ong ba ïa ki nongthoh (Candidates) lada don  ka jingbym hun ki lah ban file jingujor ban phah correct biang ïa ka answer jong ki wat hadien ba la ioh ïa ka result shuh shuh lada ki  dang khuslai ki lah ban file daka application sha ka ophis ka DERT ruh ban pynbeit bad ban jingpynshai. 

Ka seng ka la pynsngew ruh ba ka jingkynrum kynram ha kaba ïadei bad ka MTET exam kam dei ka sien ba nyngkong kumta ka seng ka la kyntu sha u ne u Minister ba un pynytikna ba ka dei ban iaid beit iaid rynti khnang ba kan nym buh jingartatien ne sah umdum ïa ki ba ïakhun ïa ka ne ka examine, na ka liang jong u ne u myntri ruh u la kular ha khmat ka seng ba ka sorkar kan sa peit bniah bad kan sa shim ïa ka rai kaba biang khnang ba kan long ka ban pynhun ïa baroh bad kan ïaid beit ïaid ryntih.