Ka Khasi Students’ Union North Khasi Hills District Unit hapoh ka jingialam U President ka KSU NKHD Unit U Samla Ferdynald Kharkamni ha ryngkat u Samla James H. Mawphniang General Secretary ka KSU NKHD bad ki dkhot jong kane ka Seng, ha ka 29 tarik Naiwieng 2023 ki la leit ban kynduh ia u Addl. Deputy Commissioner ka Ri Bhoi District u raja Brahma ban aiti ia ka jingthoh ban pynkynmaw ia ka sorkar halor ka jingdon jong ka Petroleum Depot ha Umiam.

Ha kane ka jingleit kynduh ka Seng ka la pynkynmaw lyngba ka shithi kaba kum ka Seng ka la dep ban ai naduh u snem 2015 lyngba ka shithi no. KSU/NKHD/Memo/2015-2 bad ha u snem 2013 ruh ka seng ka la dep ban ai da ka jingthoh sha ka Kong Roshan Warjri kaba long kum ka myntri ha kato ka por. Ka Seng ka pynpaw ruh ka jingsngewkhia halor ka jingshah pynlong langknia jong ki Paidbah namar kane ka jingkhang Umphniang lane ka strike jong kine ki Mazdoor Union kaba na ka por sha ka por ka ju jia.

Ha kane ka shithi ba la aiti mynta ka sngi ka Seng ka la pynkynmaw ruh ba ia kane ka jaka kaba heh kumba 5 acre tam la aiti da ka Dorbar Shnong ban buh ia kane ka Petroleum Depot la aiti da ka Sorkar Meghalaya sha ka Assam Division jong ka Indian Oil Corporation ha ryngkat ki jingiasoi soskular ha u snem 1992-1993. Bad ia kane ka Petroleum Depot la pyntreikam naduh u snem 1995 bad la pynsangeh ha u snem 2010.

Na ka liang u Samla Rangbah Ferdynald Kharkamni u la kyntu ia ka sorkar ban pyntreikam biang ia katei ka Petroleum Depot khnang ban lah ban iada na kano kano ka jingeh ha kum kine ki jingshah khang umphniang kiba ju pynbna na ka liang ki Mazdoor Union. “Kine ki Mazdoor Union ki ju leh ia kane manla ka por khamtam ha ki snem 2011-2012, kaba pynlong ia ki paidbah kum ki langknia ki ban mad jingeh na kane ka jingshah khang ki umphniang.” Ong U Samla Rangbah Ferdynald

Na ka liang ka Seng ka la ai ka jingiaroh ia ka tnat Pulit ka jylla halor ka jingioh ban kem ia ki briew kiba donkti ia ki kam ban tuh umphniang na ki kali, hynrei ka seng ka kyntu ruh ia ki pulit ban kem lang ia ki driver ruh kiba don kti ban die tuh ia kitei ki Umphniang. Haba pynkut ka seng ka kyntu ia ka sorkar ban leh noh kloi katba lah ban pyntreikam biang ia katei ka Petroleum Depot namar kane kan iarap ban pynmyntoi ia ki paidbah da kaba pynduna ia ka dor umphniang haduh 4 percent jong ka CST Elements.