Ka Khasi Students' Union, Employment Monitoring Cell hapoh ka jingialam u Samla Reuben Najiar u ba long u Chairman ka Cell haka 24 tarik u Naiwieng 2023 ka lah ioh ban iakynduh bad u Vice Chancellor ka Skulbah NEHU kata u Prof Prabha Shankar Shukla ban iakren halor ka jing ailad kyrpang (First preference) iaki samla khasi ki ba thep kam iaki Non Teaching Posts jong ka Grade B bad C kaba ka Skul Bah NEHU ka dang shu pyllait shen.

Ha ka jingiakynduh ka Seng ka lah pynkynmaw iaka jing iakren jong ka Seng bad u VC kaba lah long haka 16 tarik u Nailar 2023 ha kaba ka Seng ka lah dawa ban ailad kyrpang iaki Samla Khasi ki ba thep iaki Kam ha ki kyrdan bapher bapher jong ka Skul bah NEHU.

Shuh shuh ka Seng ha katei ka jingiakren ka lah pynpaw ba ka jingdon jong ki samla Khasi ha ki department bapher bapher jong ka NEHU kan wanrah iaka jingai jingshakri ka ba kham pura namar ka jingsngew trai ka jong ki iala ka Skulbah NEHU kaba don hapoh ka Jylla lajong.

Kumjuh ka Seng ka lah iai ban ruh iaka jingjia ba dang shu jia shen hapoh NEHU hakaba ka lah don ka jingthmu ban batbor jong u wei u Ophisar jong ka NEHU ia ka Samla Khasi ha ka 19 tarik u Naiwieng 2023 kaba lah pynshong syier ia shibun ki samla pule kiba don hapoh ka Skul Bah NEHU, ka Seng ka lah pynpaw ba naka liang ki bor ba dei khmih iaka NEHU ba kim dei ban ailad ba kum kine ki jingjia kin nang jia shuh bad ban pyntikna ruh iaka jingshngaiñ ka jong ki samla pule kynthei kiba don hapoh ka Skul bah.

U VC ha kaba iadei bad ka jingiakren u lah mynjur ia kaei kaba ka Seng ka lah buh jingdawa hakhmat jong u bad u lah ai ruh ia ka ktien kular kaba na ka liang ka Skul bah NEHU kan ailad kyrpang iaki Samla Khasi ki ba thep hakitei ki post bapher bapher bad ki ba lah ban pyndep iaki kyndon baka NEHU ka dawa.