Ka Khasi Students' Union (KSU) ka pynpaw ia ka jingsngewsih kaba kthang halor ka jingduh noh ia uwei u dkhot ba shitrhem jong ka seng, u samla Augustine Nongrum uba la khlad noh mynnin ka sngi, ka 24 tarik u Lber 2023 na ka jingpang.

Ka KSU kan iai kynmaw tympang ia ka jingshakri ba radbah une u para samla uba la aiti met bad mynsiem, miet bad sngi ban ia khun na ka bynta ka dawbah ka Jaidbynriew lyngba ka KSU.

U samla Augustine u bat ia ka kyrdan General Secretary jong ka KSU Eastern Ri Bhoi Border Area bad ruh kum u President ka KSU Umktieh Unit. Une u samla lem bad ka iing ka sem ka jong u ka la shah pyntyrha bha ha ki bor sorkar ha ka jingiakhih pyrshah lynti rel ha u snem 2017. U la shah kem bad shah set along haduh 3 bnai kynthih lem bad kiwei ki dkhot ka seng.

Ka seng ka phah ia ka kyrwoh sngewlem sha ka iing ka sem ka jong u bad kan iai don ryngkat bad ka iing ka sem une u samla uba la shakri khlem kynran dien tad haduh ki sngi ba khatduh jong u ia ka Jaidbynriew. 

Ka jingleit on tep ia u samla Augustine kan dei lashai ka sngi, ka 26 tarik u Lber 2023 ha lum jingtep Katholik ha shnong Umktieh, Bhoi Rymbong.