Ka Khasi Students' Union (KSU) ha ka 26 tarik u Kyllalyngkot, 2025, hapoh ka jingialam jong u Samla Hopeful Born L. Mawnai, Assistant Organizing Secretary KSU-CEC bad Samla Basuklang N. Khongwar, Vice President South East Central Circle Pynursla, ka la leit leit jngoh bad noh jingiarap lem ia kawei ka longiing na thaiñ Ri-war Pynursla kaba la mad ia jingjia lanot, ha kaba kawei ka heprit kaba dang 5 snem ka rta ka mad ia ka jingpdung/ing ding. Kane ka Heprit ka la ia kynduh ia katei ka jingjia la katto katne por bad ha ka por ba ka kmie jong ka dang leit bylla bad ha katei ka por ba kane ka heprit ka dang don tang para khynnah ha la iing, kumno re kumno ka la ur ha ka ding bad ki jaiñ ba ka la phong ki la kemding bad pynlong ia ka ba kan mynsaw jur.

Hadien kata na ka liang ki ba ha Ïing jong katei ka khynnah ki la rah noh ia ka shapoh Lawmali Hospital khnang ba kan ioh ia ka jingsumar bad dei hadien kane ba na ka liang ka KSU ka la ioh jingtip na ki briew kiba don ha katei ka hospital shaphang katei ka jingjia. Kumta ka KSU hadieh ba ka la ioh jingtip ba kane ka longkmie kaba dei ka kmie jong kane ka khynnah ka dei kaba la sah riew kynthei bad mar mar ka KSU leit jngoh ia kane ka khyllung kaba dang shah sumar bad ban kner ruh ia la ka kti jingiarap bad noh synniang jingiarap lem ia kane ka longiing na ka bynta ka jingsumar ia kane ka Heprit.

Na ka liang jong u Samla Hopefulborn Lyngdoh Mawnai, Assistant Organizing Secretary jong ka KSU-CEC ha ka por ba uleit jngoh ban ai jingiarap lem ia katei ka long Ïing u la pynpaw ba u dap da ka mynsiem jong ka jingsngew synnei na ka bynta katei ka longiing kaba mad ia katei ka jingjia bad u lakren ruh ia ki kyntien ai mynsiem ia ka kmie bad ki ba ha Ïing jong katei ka heprit ban kitbok kit rwiang ba kan ioh kloi noh ia ka jingkoit jingkhiah lyngba ka jingsumar. Shuh shuh u la ong ruh ba ka Seng hi ha la i bor barit kam lah ban synniang shibun ka jingiarap, hynrei ine i jingiarap iba rit i dei ruh ka dak jong ka mynsiem shakri bad mynsiem kyrshan jong ka KSU ia la ki paradoh ki para snam kiba mad ia kum kine ki jingjia.