Ka Khasi Students' Union lyngba ka Employment Monitoring Cell ka la leit buh dorkhas sha u Director (Corporate Affairs) jong ka MeECL halor ka jingslem na ka liang ka MeECL ban thung ia ka kam Assistant Engineer (Electrical/ Mechanical). 

Ia kane ka post jong u Assistant Engineer (Electrical/Mechanical) ki la pyndep ia ka eksamin (written examination) ha ka 13 tarik Naitung, 2019 bad la pynmih ia ka result ha 19 tarik u Nailar, 2019 ha kaba la jied ia 24 ngut ki ban hap leh ia ka interview (personal interview) ha 26 tarik u Nailur, 2019. Phewse shuwa kata ha u 22 tarik u Nailur 2019 ki la pynpep noh ia kane ka interview bad la 4 snem tam kim shym la lah shuh ban pynurlong ia kane ka kam.

Ka Seng haba ia kren bad ki bor pyniaid jong ka MeECL ka la ioh jingtip ba ka MeECL kam shym la lah ban thung kam iano iano ruh naduh u snem 2020 namar bym don pisa ban siew tulop bad ia ki post ba kyrkieh ba donkam la shu thung kontrak (contractual basis). 

Ka Seng lyngba kane ka kyrwoh ka kwah ban buh dak jingkylli ia ka Sorkar jylla, khamtam eh ia ka Power Department ba kaei ka sienjam ba ka la shim ban pynbeit ia ki kynrum kynram ha MeECL bad kumba ka long mynta kaei ka lawei jong ka MeECL. Ka Seng ka dawa na ka Sorkar jylla ba kadei ban shimkhia halor ka thung kam thung jam ha ka MeECL bad kumjuh ruh ban pynlait ia ka tulop jong ki nongtrei ka MeECL ,namar mar ia mih na ka jingiakren wan ki nongtrei MeECL ban pynsngew sha ka Seng ba ym pat pynlait ia ka tulop ka jong ki.