Ka KSU North Khasi Hills District Unit lyngba ka Education Cell ha ryngkat ka jingiatreilang bad ka shlem ai jinghikai El Elyon Institute kan pynlong ia ka Free Coaching Class na ka bynta ki samla pule ba dang ap ia ka result Class 12 bad kiba la pyndep ia ka Higher Secondary School Leaving Certificate (HSSLC) ba kin pynkhreh ia ka Common University Entrance Test (CUET) Under Graduate (UG) ban pyniaid da ka National Test Agency (NTA) kane ka CUET-UG kan dei ka sien kaba nyngkong ba la NTA kan pyniaid ia kane ka exam.

Ha ki snem ba la dep ka NTA ka la pynlong ia ka exam CUET na ka bynta ki Post Graduate ki samla pule ki hap ban pass ia ka CUET-PG ba kin ioh rung class ha ki skulbah bapher bapher la ka dei ha jylla Meghalaya ne shabar jylla kumta ka KSU ka sngewdei ban shimkhia ia kane ka mat khnang ba ki samla jong ngi kin ioh rung class wat shabar jylla ruh.

Ka El Elyon Institute ka dei ka Shlem ai Jinghikai kaba ai jinghikai bapher bapher ia ki samla hapoh ka them Ri Bhoi.

Kane ka lad ban ai ka jingshakri sha ki Samla Pule ka Thaiñ jong ngi lyngba ka jingai Jinghikai ei ia ki Samla ban pyntbit ialade ban thoh ia ka Exam CUET kaba yn pyniaid da ka NTA kaba long ka Exam kaba Kongsan ha shwa ba ki Samla jong ngi kin rung sha ki Kyrdan kiba kham shaneng ha ki jingpule (Academic).

Kane ka sienjam ba ka KSU ka shim ka long ruh ban pynshlur ia ki samla pule ba kin lah ban pynkhreh khambha ha ki wei pat ki exam ha ki kyrdan ba kham shaneng ha ka pule puthi.

Ka plie lad ia baroh ki samla ba kin mih shakhmat ban pynkhreh ia ka exam CUET na ka bynta ki Samla ban rung class na ka bynta ka Under Graduate ha kaba ka pdiang sngewbha ia ki samla na poh ka dong ka thaiñ Ri Bhoi bad kumjuh ki Samla pule jong ka Jaidbynriew Khasi na ki wei ki District ha kaba ki lah ban shim bynta da ka online class.

Ki Form na bynta kane ka Free Coaching CUET- UG la pyllait naduh ka 6 tarik u Iaiong 2024 bad kan kut haduh ka 19 tarik u Iaiong 2024 bad ia ki class yn sdang naduh ka 22 tarik u Iaiong 2024 bad ka por kan dei 3 baje haduh 5 baje janmiet man ka sngi ha Nongpoh.

Ka seng ruh ka dawa ba ka tnat pule puthi ka sorkar jylla kan pynbun ia ki examination centre hapoh ka jylla ha man ki district headquarters na ka bynta ka jingsuk bad ka bit ka biang ki samla pule ka jylla jong ngi.

Ia ki jingtip ba khambniah phi lah ban phone ia kine ki number phone +91 9366172780 lane +91 9383145301 lane +91 9612056636.

Ngi kyrmen lyngba kane ka sienjam kan wanrah ia u soh u thiang na ka bynta ki Samla jong ngi.