U Badonkupar Synnah u la pynshohbiej ia ki paidbah nongkyrshan, hadien ba u la lah ban khur ia ka jingjop ha ka kyrdan iakura jong ka light welterweight 60-63.5kg fight ha ka sngi kaba ar jong ka 7th Elite Men’s National Boxing Championship mynta ka sngi ha SAI Indoor Hall, Shillong.

Kane ka lympung iakura ka ban kut ha ka 1 tarik u Nohprah, la pynlong da ka Meghalaya Boxing Association ha ryngkat ka Boxing Federation of India bad la kyrshan lang da ka tnat Sports and Youth Affairs jong ka Sorkar Jylla.

Ha kane ka sngi, u Synnah uba la iakhun pyrshah ia u Roopesh Shukla uba na Madhya Pradesh, u la khur ia ka jingjop hadien ba u la tam point bad ban pynhun ia ki paidbah nongkyrshan kiba la wan ban sakhi ia kane ka jingiakura. Te kumta u Badon u la long uba nyngkong eh na ki nongiakura ka Jylla ban jam sha kawei pat ka wat jingiakhun.

Ha kane ka sngi kaba ar, la lah ban pynlong haduh 78 tylli ki bouts bad ki rangiakura na kylleng ka ri ki la khmih lynti ban ialehkai bha na ka bynta ban jam sha kawei pat ka wat jingiakhun bad ruh ban khur takma.

Ha kane ka rynsan iakura la wan iashim bynta da ki khlur iakura jong ka ri, kynthup ia u rangiakura uba la khur ia ka takma ksiar ha ka South Asian Games u Sachin na Services uba la iakhun pyrshah ia u Vishal Kumar uba na Punjab ha ka 54-57kg featherweight bad u la lah ban khur ia ka jingjop da kaba tam point.

U rangiakura uba la khur ia ka takma rupa ha ka Asian Championship 2019 u Ashish Kumar na Himachal Pradesh u la iakhun pyrshah ia u rangiakura na Manipur u Kingson ha ka featherweight. Hapdeng kane ka jingiakhun kaba iakhaid bha, hynrei u Kumar u la lah ban khur ia ka jingjop.

Kiwei pat ki rangiakura ka Jylla (Meghalaya), ba kynthup ia u Kordor Marwein ha ka lightweight 57-60kg, u la shah rem ha u Aditya Nagar na Uttar Pradesh hadien ba u rephri u la hap ban pynsangeh noh ia ka jingiakhun ha ka wat kaba nyngkong. Kane ka jingpynsangeh ka la wan hadien ba u Kordor u la shah kura tyngeh ha utei u rangiakura uba na UP.

Ha ka 48-51kg flyweight, u Khrawbok Marwein u la iakhun pyrshah ia u rangiakura uba na Bihar u Shiv Kant. Watla u la shah kura bad khyllem ha madan, hynrei u la pyrshang katba lah ban iakhun tyngeh bad ha kaba kut u la shah rem noh hadien ba u la shah tam point ha utei u rangiakura uba na Bihar.