Ka Khasi Students’ Union (KSU) mynta ka sngi kata ka 13 tarik u Naiwieng 2020 ka la ioh ban pynskhem ia artylli ki Unit ki ta ka Sohkhwai Unit bad ka Shakoikuna Unit ki ba hap hapoh ka jingpeit jingkhmih jong KSU Arphew Mer Circle bad ka ba hap hapoh ka KSU North Khasi Hill District Unit (NKHDU) hapoh ka ïing shnong jong ka shnong Pahammawleiñ. Ha Kane ka sngi la pyniaid ia ka jingialang da U samla Lambok Rymbai, General Secretary KSU North Khasi Hills District Unit (NKHDU).

Bad lawan pynshngaiñ lang da ki Samla Nongialam Jong ka Seng ki ba Kynthup ia u Samla Badon Kupar Nongbri, Assistant Office Secretary KSU CEC, Samla Biangbor Paliar Vice President KSU CEC u ba dei ruh u nongpeit nongkhmih (Incharge) ia ka KSU NKHDU, Samla Ferdinald Kharkamni President KSU NKHDU, Vincent Makri Assistant Finance KSU NKDHU, Samla August Nongbri Finance Secretary KSU NKHDU, Samla Banjop Maring Education Secretary KSU NKHDU, Samla Khraw Sylliang President KSU Arphew Mer Circle bad ha ryngkat jingdon lang u samla Bah Jayand Sylliang Assistant G.S KSU NKHD, bad hakajuh ka por u ba long u Rangbah Shnong jong ka shnong Pahammawlieñ, bad ki dkhot ki nongkitkam jong ka KSU Northern Border Area Unit .

Ha ba ioh ka jingsneng kyntu kynpham na u Samla Banjop Maring u la ong ba, “Ka KSU ka long ka seng ka ba long kum u dieng u ba don ha kliar lum, u iai shah ia u slap, u lyer bad watla ki bun kiba kwah ban pynkhyllem ia u hynrei u iai bteng ban ai um bad ai sboh ia ki ba don sha them” .

U Samla Biangbor Paliar haba ai iaka jingkren u la ong, “ Ba u Kuli, u lathi, bad ka ïing byndi, ngi hap ban mad ha ka jingiaid lynti kum u dkhot ka KSU” .

Ha katei ka sngi lah ioh iaka jingpynskhem ia artylli ki Unit da u Samla Rangbah Lambokstarwell Marngar President KSU CEC.

Ha ba ai jingkren kyntu kynpham u Samla Rangbah Lambokstarwell Marngar u la ong, “U Wickliffe Syiem ha ki nong Ri Thor u long u anti-indian bad ha la ka jong ka Ri u long u Khlawait ka jaidbynriew, bad kum ki Samla ngi dei ban sngewthuh ba dang lah ban shah khieñ anti-Indian ha ki nong ri thor nabynta ba ngi ieng ha ka nongrim ban iada bad ban pynneh pynsah iala ka jong ka Jaidbynyriew Khasi, ban ia ka ba mane ia ki blei ia ki rithor katba ki paia bad ki rishot ka Jaidbynyriew ki nang tor bad nang tlot katba nangmih ki sngi.”

Shuh shuh u la bynrap da kaba ong “ Ka jingrem ha madan thma kam dei ka ba jah burom hynrei ka ba pyndem khlem da shlan ban ia ai reng ka dei ka ba jem rngiew bad poh dor”.

Ia ka Shakhoikuna Unit la pynskhem ia u Samla Rovinson Maring kum u President bad U Samla Chem Nongshli Kum u General Secretary ha ryngkat ki 17 ngut ki dkhot.

Bad ia ka Sohkhwai unit la pynskhem ia i Samla Nat Namsaw kum u President bad ia u samla Arius Sylliang kum u General Secretary ha ryngkat ki 16 ngut ki dkhot.