Ha ka 10 tarik U Naiwieng 2021 ka Consumers' & Farmers Protection Cell jong ka Khasi Students' Union hapoh ka jingialam jong u Chairman U Samla Spaiñdarsing Lyngkhoi bad U Assistant Secretary, U Samla Wallamkupar Nongsiej ha ka jingïadon ryngkat lang ki dkhot bad ki Nongïalam ka KSU Umiam Circle bad ka KSU Umsning Circle ka lah ioh ban pdiang burom ia I Kong Trinity Saïoo ha ka Umsning Bye Pass Ri Bhoi District . 

Kane Jingpdiang burom ka KSU ïa i Kong Trinity Saïoo i ba long ruh I Nonghikai bad I Nongrep ba Nyngkong tam eh na ka thaiñ ban lamlynti haduh kane ka kyrdan ban shakri paidbah bad ban ïoh pdiang ïa shibun tylli ki khusnam bad khamtam eh ïaka khusnam Padmashri Award na U President ba ha khliehduh ka Ri. 

‌Ka Consumers' & Farmers Protection Cell jong ka Khasi Students' Union Sengkmie ka la kitbok kitrwiang ïa ka Ïing ka Sem ka jong I bad kumjuh ruh ba kane ka jingïoh pdiang burom ka jong I kan ai mynsiem ïa kiwei pat ki Nongrep ha ka jylla ba kin ïai long u budlum jong ka ïoh ka kot ha ka jylla bad khatam ruh ban long kiba ïatylli para Nongrep. 

"Ka Jingshakri Jongphi ha ka Imlang Sahlang ka wanrah ïaka nam bad ka burom ïangi lang baroh bad ngi ngeit skhem ba kin kylla long  pat kum ki matti kiba yn ïai Pyrto da ki khun ki hajar, ki Longdien Mandien bad ka Jaidbynriew hi baroh kawei".