Ka Khasi Students’ Union (KSU) War Jaiñtia Circle hapoh ka jingïalam jong u President Samla Laitphar Syngkrem, General Secretary Samla Lurman B Talang bad Finance Secretary Samla Kindly Khyriem ha ryngkat ki Dkhot haka 4 tarik mynta u bnai kala leit ïa kynduh ïa u Dr. A War uba dei u DHS ban pynbiang ïaki jingdonkam ki PHC hapoh Amlarem Sub Division. Ki Nongïalam jong ka Seng haka jingleit jurip bad ïakren bad ki Doctors incharge ki PHC bapher bapher hapoh War Jaiñtia la ïoh jingtip ba ka don ka jingdkoh bad jingduna ha ki liang baroh. Na ka liang jong ngi ka seng ngi la dawa na ka bynta ka Jaraiñ PHC ba dei ban thung sa I wei I Doctor namar ba don tang iwei I Doctor, kawei ka Ambulance ka ban ban pynsuk ïaki nongpang ba hap ha ka Jaraiñ PHC bad ki shnong ki thaw ba marjan ruh namar ka la heh bha ka area bad ka Labour Room kaba don hapoh ka tei ka PHC kaba ym shym la treikam. Ha ka jingïakren bad I DHS i la kular ban pynkhreh ïa kine ki jingdonkam ban phah sa iwei I Doctor ha Jarain PHC, ka Ambulance ruh in sa pynpoi kawei ban pynsuk ïaki nongpang nong shitom ban poi sha ki jaka ai jingsumar bad ban phah 2 ngut ki nurses ban ïarap ha ka Labour Room bad I la phone ruh sha I DMHO, Jaiñtia Hills Ditrict ban pynstet ïa kane ka kam. Ha kaba ïadei bad ka Pdengshakap PHC ruh I la kular ban peit ban khmih ïaki jingdonkam kane ka PHC, I la ai ruh ka jingïaroh ïaka jingtrei shitom I Doctor Incharge ka Pdengshakap PHC wat lada I don tang marwei. Ka Seng ha kaba iadei bad ka jingwad jingtip ïaka rukom treikam ka Ambulance Dawki PHC, la ïoh jingtip na I Doctor Incharge ba u Driver jong katei ka Ambulance um ju wan trei, um ju sngap ïaka jingbthah ki Doctor halor kane ka Seng kala dawa na I DHS ba dei ban weng kam ïa kum kine ki briew bad ban thung da kiwei ha ka jingshisha kum kane ka kam ka ban ïarap ïaki nongpang ban poi ne ïoh jingsumar lyngba kane ka Ambulance. Ha kaba ïadei bad kane ruh I DHS I la kular ban shimkhia bad ban teh lakam ïa kum kine ki briew kumno kin shu shim ïaka tulop khlem da leit trei, in sa shim ïaka report na I Doctor incharge bad na I DMHO. Ka KSU Jaiñtia Circle ka ai khublei kyrpang ïa I DHS Dr. A. War iba la kular ban shimkhia ban pynbit pynbiang ïaki jaka ai jingsumar kiba don ha baroh kawei ka Amlarem Sub Division ba kin long kiba ba bit ba biang ban pynsuk ïaki paid nongshong shnong hapoh War Jaiñtia. Kane ka long ka kyrwoh na u General Secretary Samla Lurman B. Talang.