Ka Khasi Students' Union (KSU) Nongsder Unit ka la pynlong ia ka prokram sam khusnam ba la ai kyrteng "Mait shaphrang Award 2020", ka khusnam pynshlur sha ki Samla ba pass bha ha ka SSLC, HSSLC-2020 bad kumjuh ruh ia ki samla ba sengkam lajong.

Ia kane ka prokram la pynlong ha ka 6 tarik u Ïaiong 2021 ha Ïing Dorbar Shnong Nongsder hapoh shnong Nongsder. Ka jingthmu ba kongsan da ka jingai ia kane ka khusnam ka long ban pynshlur ia ki samla pule ba kin minot bha ha la ka jingpule bad ban ai mynsiem bad ban pynshlur ia ki samla sengkam lajong ba kin tur shakhmat ban khyllie biang pat ia ka kha-ï ka pateng u Hynñiewtrep. Ha kane ka sngi ka Seng ka la sam ruh ia ki kopi sha ki arphew san ngut ki khynnah skul jong ka shnong kiba wan na ka Longïing baduk ba kyrduh.

Ia kane ka prokram ha kane ka sngi la pyniaid da u Samla Sherboklang Suting General Secretary ka KSU Nongsder Unit. La ioh ia ka jingkren na u Kongsan jong kane ka sngi , U Samla Ostarnic Marbañiang u ba dei u Organising Secretary ka KSU Sengkmie uba la ong ba ka por ka ia ka la ih ba ki Samla ka Jaidbynriew kin kyndit thiah noh bad ban pynkhlaiñ biang pat ia ka Jaidbynriew ha ki liang bapher bapher bad ban shim ia ka jing longtrai ha baroh ki kam hapoh ka ri. U Symbud Kongsan jong kane ka sngi I Bah Ryngkatlang Lyndem MDC Langkyrdem-Laitkroh Constituency I la ong ba ka long kaei kaei kaba dap da ka jingsngew khia shaphang ka Ri bad ka Jaidbynriew namarba naduh ki snem kiba mynshwa eh bad haduh kine ki sngi, ki Samla ka Jaidbynriew ki dang hap ban iai mih surok ban iakhih na bynta ka hok ka Jaidbynriew. U la ong shuh shuh ba u kyrmen skhem ba da ka jingraikut jingmut jong ki samla ka Jaidbynriew khamtam kine kiba la ioh pdiang ia ka Khusnam, ka lawei jong ka Ri bad ka Jaidbynriew sa shisien biang kan phyrnai bad shong shngaiñ. Kumjuh ruh la ioh ia ka jingkren na I Kongsan kyrpang kane ka sngi I Bah D. Khonglam iba long ruh I Rangbah Shnong ka shnong Nongsder iba la ai mynsiem ia ki dkhot ka KSU ba kin iai trei shitom na ka bynta ka bha ka miat bad ka suk ka saiñ ka imlang sahlang hapoh shnong bad ba ma ki kin long ka jingkylla ha ka lawei. Ha kane ka sngi la ai ia ka Khusnam Maitshaphrang Academic Award sha ki Saw ngut ki samla pule bad ia ka Maitshaphrang Entrepreneurship Award sha uwei na ki samla uba seng kam lajong.

La ioh ruh ka jingkren ha kane ka Sngi na U President ka KSU Nongsder Unit u Samla Basuklang N. Khongwar uba la ong ba ki samla kim dei shuh ban dang sngewthuh bakla ba ka pule puthi bad ka jingnang jingstad ka dei tang na ka bynta ban ioh kam sorkar hynrei ka dei na bynta pynjanai ha ka jingshakri lyngba ki kam ba donburom ia ka Jaidbynriew ha ki bynta bapher bapher. U Samla Ennocent Khongstia U President ka KSU South Central East Circle Pynursla u la ong ba ka donkam ia ki samla ka Jaidbynrew ban pyndonkam ia artylli kiei kiei, kata U Khulom bad ka waitlam. Don ka por ka ki samla kin pyndonkam ia u khulom bad don pat ka por ba ki hap ban pyndonkam ruh ia ka waitlam ban iakhun na bynta ka ka Ri bad Jaidbynriew. La ioh ruh ka jingkren ha kane ka prokram na u Samla Pyndapborlang Nongrum President ka SSSN bad bud ka jingai khublei ba la ai da u Samla Saplaimon Nongrum u Education Secretary ka KSU Nongsder Unit.

La pynphuh pynphieng bad la pynshngaiñ ha kane ka sngi da ka jingwan synran lang ki dkhot ka KSU na ki shnat treikam bapher bapher bad na ki Nongialam ka KSU South Central East Circle bad kumjuh ruh kiwei pat ki Nongkitkam ka KSU Sengkmie. Ia kane ka kyrwoh la phah da u Wanpyndap Mawïong Publicity Secretary ka KSU Nongsder Unit.