Ha ka 8 tarik U Kyllalyngkot 2022,  ka KSU Delhi Unit kala ïoh ban pyllait ïaka kot “ Ka Jingim Ka Riewshlur Ka Ri Khasi” bala thoh da U Bah Danielstone Lyngdoh u ba dei ruh u Nongaibuit ka KSU Delhi Unit shaphang ka jingim jong I Meiieid Spility Lyngdoh Langrin (Bam Kwai Ha Dwar U Blei) kum ka dak ban pynsah nam ïaka nongrim kaba i ïeng na ka bynta ka dawbah bad ka pateng jong ka Jaidbynriew. 

Ai ba kane kan dei ka jingai mynsiem ïaki longdien bad ruh ïa kiwei pat ki Nongthoh ba kin nang ïai synñiang ïala ka sap thoh na ka bynta ki riewkhraw kiba la lenlade na ka bynta ki pateng bad kane kan long shi bynta ruh ban pynriewspah ïaka ktien lajong, la ong U Bah Samuel Jyrwa uba long ruh u Kongsan ha kane ka Sngi. U Kongsan u ba dei ruh U President barim ka KSU u la pynkynmaw ba haki snem 1990 ter ter ha ka por ba ka Atomic Mineral Division (AMD) kala ïoh jingbit ban leh ïaka exploratory mining hapoh ka Shnong Domïasiat, ka AMD kala ïohlad ban khlong ïa u Uranium haduh 600 ton napoh Nongbah Jynrin bad dei hadien ba I Meiieid Spility I la ïohi ïaka jingktah jong ka lyer bih Uranium ïaka shnong bad ki jaka ba marjan, i la rai ban ïeng pyrshah bad shim ïaka rai ban dawa jur ban phah pynsangeh shisyndo ïaka exploratory mining jong ka AMD na ka Sorkar Jylla. U Bah Samuel B Jyrwa U la pynkynmaw ruh ïaka jingshimkhia jong U Ma Hopingstone Lyngdoh Nonglait MLA ( Bam Kwai ha Dwar U Blei ) ban pynthikna ïaka jing pynsangeh halor katei ka kam jong ka AMD ha u Snem 1994-95. Ha U Snem 1995 ter ter, ka jingïakhih pyrshah ban tih Uranium kala klang hadien ba ka UCIL kala pyrshang ban thom da ka bor ïaki dkhot jong ka KSU kiba la ïeng pyrshah bad dei ka jing shynrang mynsiem bad skhem Nongrim jong I Meiieid Spility, Ki Nongïalam jong ka KSU bad ka jingkyrshan ba radbah jong ki Paidbah ka dong ka thaiñ kiba la ïohi ïaka jingma kaban wan lada ailad ban tih ïa utei u Marpoh Khyndew napoh ka Ri khasi  kum ba la jia ha ki par Uranium hapoh Jaduguda, Jhakhand bad ka jingïakhih kaba na u snem sha uwei pat ka ïaï bteng kala pynbor ïaka Sorkar Jylla bad ka Sorkar India haduh u pud ba ki hap ban pynduh pyndam ïaka jingailad  ïaka AMD bad UCIL ban khlong ïa U marpoh khyndew Uranium na kane ka Jylla ha U Bnai Nailar 2016, la Ong u Bah Samuel.

 Watla ka Jingdon jong katto katne ngut ki briew bad ki kynhun da ka jingthmu ban pyn sngewthuh bad ïalam bakla, ki khlem lah pat ban ïeng hakhmat ka Nongrim kaba skhem jong I Meiieid Spility haduh ba i la kyntait war ïaki jingtyrwa pisa bad ki Sbai Rupa. Ka jinglenlade jong I Meiieid Spility kadei ban ai jinghikai ym tang ha kane ka pateng hynrei wat ha ki pateng kiban dang wan da kaba kynthup ïaka jingim jong kane ka Riewshlur hapoh ki Kot skul bad Kolej, la Ong U Kongsan.

“Na ka Shyngkan U Riew Ieit Ri” sha “Ka Kyoh Mynthi U Mawnguid Briew”  kiba dei ki jingrwai kiba la mih na ka Mynsiem ki khraw pyrkhat jong ka Ri Khasi ha ka por ba ka jingshah thombor ïa ka Jaidbynriew ka jur bad ka jingïaleh ka Rhem, U Nongïalam barim Ka KSU Southwest Khasi Hills U Samla Rangbah Blossding Wanñiang u ba long ruh kum U Symbud Kongsan u la batai bin pa bin  ïa ka jingïaid lynti jong ka KSU haki snem 1991 shaneng kiba long kum ki lyhuh ding bad ki shiah kiba thar kaba pynlong satar pat ïaki Nongïalam bad ki dkhot ka KSU bad khamtam haba ki rai Rangbah ban ïaid ryngkat haka Nongrim kaba i Meiieid Spility i la ïeng bad ïeng syndah haduh ki sngi ba khatduh ki jong i na kane ka sla pyrthei. 

U Babu Phrijune uba dei ruh u Khun Nyngkong Jong I Meiieid Spility u la pynpaw ka jingsngewnguh ïa ka KSU ba ka ïai pynim ïaka Kyrteng bad ka Nam ka Jong I bad ka jingïaïdon ha syndah naduh ki por ba la leit bad haduh mynta mynne, u la pynpaw ba na ka liang ki ïing kin ïeng Skhem ha ka Nongrim kaba i kmie jong ki I la Ïalam bad u la pynpaw ruh ïaka jingsngewnguh ïa u nongthoh ba u la pynlut por ban ïakynduh ïaki ban tip kham bñiah ïaka jingim i Meiieid Spility Lyngdoh Langrin. 

La  pyllait ïa katei ka kot da u Kongsan U Bah Samuel B Jyrwa U ba Long ruh U Chairman Jongka NESO bad u President Rangbah barim jong ka Seng KSU, U Symbud Kongsan U Bah Blossding Wanñiang uba dei U President barim Jong ka KSU Southwest Khasi Hills, ha ryngkat ka jingïadon lang U khun nyngkong jong I Meiieid Spility U Babu Phrijune Lyngdoh Langrin, I Dr Barrylia Wolflang I ba dei i Editor jong katei ka Kot bad i ba bat kum ka Associate Professor Jong ka Khasi Dept ha Lady College, U Bah Powell Sohklet, U Bah Nostradamus Lyngdoh Langrin, U Samla Manly Nongpluh uba dei ruh U Finance Secretary jong Ka KSU Sengkmie, U Samla James H.Mawphñiang uba dei ruh U Asst General Secy jong ka KSU Sengkmie, U Bah Kynpham Kharlyngdoh uba dei ruh u Nongaibuit Jong ka KSU Delhi, ki Nongïalam bad ki dkhot jongka KSU na ki Circle bad ki Unit bapher bapher, ki nongïalam jong ka LYWA, ki nongïalam jong ka PYT-IN bad U Nongthoh Jong katei ka kot U Bah Danielstone Lyngdoh hapoh ka Ophis treikam jong ka KSU Sengkmie. 

U Samla Danielstone Lyngdoh uba dei U Nongthoh jong katei ka kot u la ban jur ba ngi dei ban bud ïa ka lynti kaba i Meiieid Spility i la ïalam bad ka Jaidbynriew ka donkam ban ithuh bad pyrto ïa ki kam jong ki Riewkhraw bad Riewshlur ka Ri Khasi bad ngi dei ban pynsah nam bad ïasam lang sha ki pateng kiban wan bad sha ka pyrthei hi baroh kawei.

Ïa katei ka Jingïalang la pynïaid da U Samla Wallamkupar Nongsiej, la ïoh kyntien pdiang sngewbha na U Samla Juster Lyngdoh bad la ïoh iaki kyntien khublei na u Bah Donbok Wanñiang kiba Dei ki Dkhot jong ka KSU Delhi.

(Phi lah ban thied ïa katei ka kot na “Ri khasi Book Agency”, Mawkhar Main Road; Shillong 793001 lane phi lah ruh ban ïoh na ophis treikam ka KSU Sengkmie da kaba phone ha u number +91-7005369458).