Haka 9tarik Rymphang 2023 ka KSU Mawlai Circle kala ïoh ban pynlong biang ïaka Maitshaphrang Khasi League Basketball Tournament 2023. Ha kane ka kynti ïa kane ka Tournament la pynlong noh ha Madan Basketball jong ka Shnong Mawlai Nongpdeng. Ïa katei ka Tournament lawan ban plie pyrda da u Bah Shemphang Lang Daniel Lyngdoh Mawphlang uba dei u Chairman ka Litigation Cell jong ka KSU Sengkmie. Hashwa ban plie pyrda kala don ka jingïalang kaba lyngkot bala pynïaid da u Samla Badonboklang Malngiang Sports Secretary KSU Mawlai Circle, laïoh ïaka jingkren pdiang sngewbha bad maitphang na u Samla Mac Iver Thabah Vice - President KSU Mawlai Circle, haba ai jingkren na ka liang jong utei u nongïalam ula pynpaw ba ka jingshim jong ka KSU ban pynlong ïa kiba kum kine ki Tournament ka long ban pynshlur ïaki khun Samla jong ka Jaidbynriew ba kin sei ïala ki sap kaba ki don namar ha kine ki sngi ki kam ïalehkai kila kylla long ka lad ïohkam ïoh jam. U Bah Shemphang haba ai jingkren kum u Kongsan U la pyn kynmaw ba ka KSU dang ha kine ki sngi ba dang shu dep ka KSU Sengkmie ka dang dep pynhap pyrda ïaka Maitshaphrang Khasi League 20twenty Cricket Tournament, na ka liang utei u nongïalam u la ïathuh ba naka liang ka Seng hadien bala ïa syllok bad ki dkhot ka SCA bad MCA ba kaei ka daw kaba pynlong ba haba ka don ka jingïalehkai haki National level kim ju don ki khynnah Khasi kiban ïoh mihkhmat na ka Meghalaya hynrei la mihkhmat da kito ki bym dei ki Khasi, ka jubab kaba kum ka Seng ka ïoh ka dei ka jing bym shimkhia ki khynnah Khasi ban wan sha ki jingai jing hikai kyrpang. Kumta naka liang ka Seng kala rai ban thawlad ban ai rynsan bad pynshlur ïaki khun Samla jong ka Jaidbynriew ba kin shimkhia ha katei ka jait jingïalehkai, kumta naka liang jong ka Seng ka sa pynkhie im biang ïaka Khasi League Cricket Tournament bad kaba la jer kyrteng kum ka Maitshaphrang Khasi League 20twenty Cricket Tournament, ka long kumjuh ruh haka Basketball bun na ki Samla kim ju sngew tynnad ïa kane ka jingïalehkai da kaba ai daw ba ngim don ïaka rynïeng kaba jrong kum kiwei pat ki Jaidbynriew, hynrei naka liang jong utei u nongïalam u la ai mynsiem ba ym dei ka rynïeng ka ban pynpaw nam ïaki hynrei dei ka jingtrei shitom bad len lade ka ban pynpoi sha ka thong, u la pyn kynmaw ba ym baroh ki player jong ka pyrthei kiba ïalehkai Basketball ki don ïaka rynïeng kaba 6phut shajrong hynrei don kiba ïa ryngkat rynïeng bad ngi ki Khasi ruh bad ka don ka lad ba ngin kiew ha kane ka jait jingïalehkai ruh. Ha kane ka sngi plie pyrda ka jing ïakhun jong ki Kynthei ka long hapdeng ka LUSSCO pyrshah ïaka ONYX ha kaba ka LUSSCO kala jop da 11 basket la 10 basket shiteng katba haka liang ki Shynrang ka Dubakh 'B' pyrshah ïaka ka Phudmuri 'A' ha kaba ka Phudmuri 'A' kala ïoh jingjop da 36 basket shiteng la 20 basket shiteng.