Ka KSU Mawlai Circle lyngba ka shnat treikam ïaka bala tip kum ka Mawlai Nongkwar Unit kaba dei kawei naki shnat treikam kaba hap hapoh ka jingpeit jingkhmih jong ka KSU Mawlai Circle haka 22tarik Jylliew 2021 haka jing ïadonlang u Samla Biangbor L.Paliar President jong ka KSU Mawlai Circle uba dei ruh ha kajuh ka por u Vice - President ka KSU Sengkmie bad u Samla Rapborlang Nongrum General Secretary KSU Mawlai Circle bad ha kajuh ka por uba dei u Assistant Finance Secretary jong ka KSU Sengkmie ha ryngkat ki Nongkitkam jong ka KSU Mawlai Circle bad ki dkhot jong katei ka shnat treikam kala ïoh ban leit ai jingïarap daki marbam kiba kynthup ïa u Khaw, Dai, Phan,Piat bad ka Umphniang bam sha ki 80tylli ki longïing jong ka shnong Nongkwar, ha katei ka sngi la ïadonlang naduh u Rangbah Shnong, Secretary Shnong lem bad ki dkhot jong ka Executive Committee jong ka Dorbar Shnong Mawlai Nongkwar.Hashwa ban sam ïa kitei ki marbam kala don shwa ka jingïalang kaba lyngkot ha Ïingshnong bala pynïaid da i Bah R.Thangkhiew iba dei u Rangbah Shnong jong katei Shnong.

         Ha katei ka sngi la ïoh ruh ïaka jingkren naka liang u Assistant Rangbah Shnong jong ka Shnong Nongkwar u bala ai khublei kyrpang ïaka Seng kaba la kloi ban ïarap haka ban kner lem la ki kti leh isynei bad lyngba jong ka jingwan jong ka Seng kala long ka jingai mynsiem ïaki nongshong shnong khamtam hakum kane ka por kaba bun ki longïing jong kane ka Shnong ki hap ban mad ïaki jingeh naka jingdon jong ka jingkhang dam,kumta kane ka jingwan jong ka ka Seng ban noh jingïarap kala long ka jing kyrkhu na bynta kito ki longïing kiban sa ïohpdiang ïa kine ki marbam kiba kum ka Seng watla hala i bor iba rit pynban kam shym la shong kli kti hynrei kala mih shakhmat ban kner lang la ki kti ban leh isynei ym tang ha kane ka Shnong hynrei lajan man ki Dorbar Shnong kiba don hapoh ka Shnong Mawlai.

          Khatduh shwa ban pynwai ïa katei ka jingïalang la ïoh ïaka jingkren na u Samla Rapborlang Nongrum General Secretary KSU Mawlai Circle bad uba long ruh ha kajuh ka por u Assistant Finance Secretary jong ka KSU Sengkmie uba haka jingkren jong u ula pynpaw ba hadien ba naka liang jong ka Jylli kala ïoh ban ïa syllok bad ki nongïalam jong katei ka shnat treikam naka liang ka Jylli kala sngewdei ban peit lang sa ïaka ki nongshong shnong jong ka Shnong Mawlai Nongkwar.Kumta naka liang jong utei u nongïalam u la ong ba dei naki daw kiba bun ba kala pynlong ïaka KSU lyngba ki shnat treikam bapher bapher kala mih shakhmat ban ïarap ïala ki para doh para snam ha kum kane ka por ba wanlap ka kyrduh ka hiran ïaki shibun bah ki longïing. Khatduh naka liang jong u Samla Rapborlang u la kyntu ïaki Paidbah ba kim dei than ban sngap ïaki nia nangne nangtai ha kaba ïadei bad ka jingai Tika bad namar kumba ngi ïohi bad ïohsngew ha kine ki sngi la bun tang ka jing batai shaphang une u Tika da kito ki briew ki bym don jingnang jingtip haka ba ïadei bad ka koit ka khiah,kumta naka liang jong utei u nongïalam u kyntu ïaka Sorkar ba ka dei ban phah da ki Doctor kiba la kham Rangbah bad kham ngam jylliew bha ha kane ka liang ban leit ban pynshai sha ki Paidbah shaphang une u Tika ym ban shu phah haki Ophisar jong ki tnad treikam bapher bapher namar kane ka buh ïa u paidbah haka jingsngew khohñioh bad jing artatien bad da kaba u kren kumtei kam mut ba u pynshlur ban ai Tika ne ban pyntieng kohtympan ban nym ai hynrei ka dei ka mon laitluid jong ki shimet la kin ai ne kim ai hadien ba kila ïoh ïaka jing ïa syllok naki stad ki jhad ha kaba ïadei bad ka koit ka khiah ula pynkut ïala ka jingkren. La pynwai ïaka jingïalang da ki kyntien ai khublei na i Secretary jong ka Shnong Mawlai Nongkwar.

        La ïoh ban aiti ïa kitei ki marbam sha ki nongshong shnong da u Samla Rapborlang Nongrum General Secretary KSU Mawlai Circle ryngkat bad i Bah R.Thangkhiew Rangbah Shnong ka Shnong Mawlai Nongkwar lem ruh kumjuh ka jing ïarap sam da u Secretary Shnong bad da ki RangbahDong jong ki Block bapher bapher.