Ka Khasi Students Union RIST-USTM Unit mynta ka sngi ka 2 tarik risaw 2023 ka la pynlong ia ka Jingiakynduh lang ki Samla pule Khasi kiba dang shu wan rung Thymmai hapoh kane ka Skulbah Khnang ban ia ithuh ithaw bad ban ioh ia ka jingiajan bad iatylli hapdeng ki para Samla Khasi.

Ha kane ka Lympung ia kynduh lang la wan sakhi da u Samla Pynkmen Sanmiet Education Secretary Khasi Students Union Central Executive Council kumnu Kongsan, u Samla Ferdinald Kharkamni President KSU NKHD Unit kumnu symbud Kongsan ha ka Jingdon Ryngkat U Samla James Hitler Mawphniang General Secretary KSU NKHD Unit bad u ba dei ruh u Secretary Legal Affairs ka KSU CEC, ki samla pule, ki Nonghikai Khasi bad kiwei kiwei pat.

Ha kane kane ka Lympung la phah ha ki ar bynta kata ka Formal bad ka Informal ha kaba la ioh ruh ban pynthymmai ia ki Nongkitkam jong ka KSU RIST-USTM Unit na ka bynta ka samoi treikam 2023-2024.

Ki Nongkren haba kren ha kane ka Lympung ki la kren ban ai Mynsiem bad ban kyntu ia ki Samla Pule ba ki dei ban long kiba sngewrit bad kiba treishitom ha kajuh ka por ruh kiba kloi ban iarap mar kylliang Para Khasi.

Ki Nongkren ki la buh ruh ia ka thong ha ki Samla Pule ban treishitom ban ioh ia ki kyrdan kiba heh hapoh ka Jylla bad ban iakhun ia ka jingrung kyrthep ki Mynder da ka Jingstad ym da ka bor met.

U Babu Dusyansar Mawlong Head of Department Khasi Department kane ka Skulbah u la ong " ka jingkhlain ka Jaitbynriew ka dei ha ki Samla bad haba im ka Ktien ka thylliej ka im ka Jaitbynriew kumta ngi donkam ia phi samla kiba long ka lawei ka Jaitbynriew ban treishitom ban long kiba stad bad ban ieid ia ki jong ki Kynja.

Na ka Liang u Samla James Hitler Mawphniang u la ong "ka Seng Khasi Students Union ka dei ka Seng kaba don ka jingkitkhlieh na ka bynta ki samla pule bad ruh na bynta ka Imlang ka sahlang. Ngi donkam ia phi ki samla kiba long ka jingkyrmen jong ngi na ka bynta ka lawei kaba phyrnai. Bad kum ka Jaitbynriew ngi donkam ia ki Riew shemphang ban wanrah ia ka lawei kaba don jingkyrmen bad kaba phyrnai la ka long ha ka thoh ka tar ha ka ioh Kam ioh jam bad ha ka Synshar ka khadar"

Na ka Liang u Samla Rangbah Ferdinald Kharkamni u la maitphang halor ka jingdon ia ki heh Sorkar lane ki bureaucrats hapoh ka Jylla ka jong da ki Khasi namar ka jingwanrah ia ki IAS na bar ka Jylla hapoh ka Jylla ka jong ngi ka lah ban pynduh nongia ngi ki trai Jylla. "Ka jingrung kyrthep ki Mynder ruh ka dei kaei kaei kaba ngi donkam ban pyrkhat bha bad kane lah ban pynduna da ka jingtreishitom ka jong phi ha kaba ngim donkam shuh ki briew nabar ban wan trei namar ki briew jong ngi ki dei kiba stad bad kiba kloi ban trei kano kano ka kam bad kane kan wanrah ruh ia ka jingkiew shaphrang jong ka Jaitbynriew ha ki Liang baroh.

U Samla Rangbah Pynkmen Sanmiet u la Pynpaw ia ka jingkmen ban ioh ia ka lad ban don bynta bad ki Samla pule kane ka Skulbah ban ai Mynsiem ban ban sneng ia ki kum ki para.

"Ha ka Jingim jong phi kum ki Samla pule nga sngewthuh ia ka jingkwah ban lehkmen hynrei kawei ngi dei ban kynmaw watla ngi leh kmen ngi dei ban kynmaw ruh ban pynlut por ban pule kot, Kumjuh ruh ban treishitom Khnang ban poi sha ka thong jong phi ha ka Jingim. Kum ka Seng ngin don ryngkat ban synran ia phi ha kiab bun ki bynta" la Bynrap u Samla Pynkmen.