Ka Khasi Students' Union North Khasi Hills District Unit ha ryngkat ki bor pyniaid ka Skul Jawahar Novadaya Vidyalaya School Niangbari, Ri Bhoi District mynta ka sngi ka la leit ban leh burom ia ka Lyngkhuh sngi iap ba 187 jong u Syiem Tirot Sing da kaba leit buh syntiew ha u mot jong une u Riew khraw ka Jaitbynriew Khasi uba don ha phyllaw jong kane ka Skul. Na ka daw ba 17 tarik ka dei ka sngi u Blei kumta ka Seng ka la leit ban buh syntiew kynmaw burom ha ka 16 tarik Naitung 2022.

Ha kane ka Jingleit buh syntiew la pynlong ia ka prokram kaba lyngkot ha kaba la ioh jingkren lyngba u Principal jong kane ka Skul u S.C. Ramchiary u la iathuh ba u la ioh sngew Nyngkong eh shaphang une u riewkhraw ka dei ha ki por ba u dang shong class ten bad u la ioh sngew lyngba ki radio bad ki drama ha ki por ba u dang leit skul bad na ka Liang jong u, u la kular ruh ryngkat bad ka KSU yn pynbha ia une u Mot jong u Tirot Sing Syiem.

Na ka Liang ka KSU, u Samla James Mawphniang haba ai jingkren u la iathuh ba ka Seng ka kynmaw burom ia u ne u khla wait ka long kum ka jingburom bad niewkor ia ka jinglenlade jong ki long shwa na ka bynta kaba mynta bad ngim dei ban klet ia ka jingnoh synniang jong ki sha ka Jaitbynriew bad kane ka Jingkynmaw burom kan nang pynrhem shuh shuh ia ka Mynsiem ieid Ri kaba don hapoh ki khun samla, u la pynkynmaw ruh ba Ka jingkloi u Paiem Tirot Sing Syiem ban aiti la ka jingim kan nang iai pynrhem ia ka pateng kaba mynta ban iada ia la ka jong ka Jaitbynriew, ia la ka jong ka khyndew ka shyiap.