Ka All Tamil Nadu Students' Association (ATSA) lyngba ki nongkitkam jong ka kiba kynthup ia u Vishnuram P (President), u Rajarajacholan (Joint Secretary), u Gideon Bala Singham (Treasurer) bad u Ragu (Advisor) ki la wan na Tamil Nadu ban ia kynduh bad ki nongialam ka KSU ha Shillong ban ia syllok halor shibun ki mat kiba ktah ia ki paid trai shnong ha North East bad ha South India. 

Ki nongialam ka ATSA ki la pynsngew ia ka jingeh ki paid Tamil bad kiwei ki paid Dravidian hapoh ri India bad kumjuh ruh ki nongialam ka KSU ki la pynsngew ia la ki jingeh bad diengpynkiang ia ka Jaidbynriew Khasi. 

Kine ki ar seng ki la ia syllok ruh halor ka jingshah iuhroit ki nong NE bad nong South India la ka dei ha ki aiñ sorkar pdeng kiba pher ba pher kum ka jingpynbor pyndonkam ia ka ktien Hindi bad ka jingshah buhai shnong pathar ha kiwei pat ki Jaidbynriew la ka dei ha Meghalaya lane ha Tamil Nadu. La ia kren bniah ruh kumno ban wad lad wad lynti ban iada ia ki trai Ri trai muluk ha Tamil Nadu bad Meghalaya, ban kyntiew ha ka liang ka pule ka puthi bad ka ioh ka kot.

Na ka liang kine ki ar seng ki la rai ba nangne sha khmat kin ia trei lang ha kaba ia dei bad ki mat ki jura kiba ktah ia ka bha ka miat bad ka iap ka im ki paid trai shnong ha North East bad ha South India. 

Ka ATSA ka la kular ruh ban iarap ia ki samla pule Khasi kiba don sha Tamil Nadu lada ki shem kano kano ka jingeh.

Ha shwa kane ka ATSA ka la ia kynduh ruh ia ki nongialam ka Naga Students' Federation (NSF) ha Guwahati bad kine ki seng ki la shim ki juh ki rai ban ia treilang nangne sha khmat.