• sangot@khasistudentsunion.com
  • Jaiaw Chapel Road, Shillong - 793002
#

Rakhe ka KSU Nongpyndeng Unit ia ka lyngkhuh snem ka ba 10 (shiphew) bad pynthymmai ia ki Nongkitkam jong ka Seng

Ka Khasi Students' Union (KSU) Nongpyndeng Unit kaba hap hapoh ka jingpeit jingkhmieh jong ka KSU Nongstoin Circle haka 27tarik Nailar 2022 kala ioh ban rakhe ia ka jinglyngkhuh snem kaba shiphew bad ban pynthymmai ia ki Nongkitkam naka bynta ka samoi treikam 2022 - 2025.


Ia kane ka lympung jingialang la ioh ban pynlong ha ka Dorbar hall jong ka Shnong Nongpyndeng bad la pyniaid ia ka jingialang da u Samla Robert Gill Khardewsaw U ba dei U Secretary jong ka KSU Nongpyndeng Unit.


Ha Kane ka jingialang la ioh ban iadon ryngkat Ki Riewrangbah jong ka Shnong Nongpyndeng, Ki Unit ki ba hap hapoh ka Nongstoin Circle, Ki nongialam jong ka Nongstoin Circle ki ba kynthup ia U Samla Franklin Syiemiong (President KSU Nongstoin Circle), Samla Willbest Wanniang (Secretary KSU Nongstoin Circle), Ki Nongialam jong ka KSU West Khasi Hills District Unit naduh U President U Samla John fisher Nongsiang, bad ruh ki Nongialam ba ha khlieh duh jong ka Khasi Students' Union baroh kawei ki ba kynthup ia U Samla Rapborlang Nongrum bad kiwei pat ki Dkhot jong ka Central Executive Council bad ryngkat ruh U Nongialam ba Rangbah duh jong ka Seng U Samla Lambokstar Marngar (President KSU CEC).


Ha ka bynta ba nyngkong la ioh ban Pyntian smai ia ki Nongkitkam jong ka KSU Nongpyndeng Unit da U Samla Lambokstar Marngar (President KSU CEC). Bad la ioh ban ai jingkren na ki Riewrangbah jong ka Shnong bad ruh la ioh ban pynshit pynshngain ia katei ka jingialang da ka kynhun nongrwai jong ka Thunder's Cave. La ioh ruh ban ai jingkren na U President jong ka KSU Nongstoin Circle bad U President jong ka KSU West Khasi Hills District Unit.


La ioh ban pynkupburom ia ki Nongseng ia ka KSU Nongpyndeng Unit bad ki Nongkitkam barim jong ka Seng.


Ha kaba khatduh la ioh ban pyllait ia ka jingrwai kaba la pynmih ka KSU Nongpyndeng Unit Kum shibynta ka jingpynsah kynmaw ia ki lynti treikam jong ka Seng da U President ba Rangbah duh U Samla Lambokstar Marngar (President KSU CEC) bad ban ai jingkren ha kajuh ka por. Haba ai jingkren naka Liang jong U Samla Lambokstar Marngar U la kyntu ia ia ki Nongialam ba haba ki shim ia ka lyngkor ki dei ban shim da ka jingsngewrit, ka jingkitkhlieh bad tiptbriew tipblei. Kum ka Seng Kam kwah ba kano Kano ka Unit kan Shah kynthoh ha kino kino ki kam ba ka leh kam sniew. Kum ka jait bynriew haba niew ia ka jingbun pait ngi la rem lypa ha ka madan bad haka jylli bah jong ka Ri India hynrei ka jinglong ka kyrpang kadei ka spah ba ngi don Kum ka Ri bad ka jaid bynriew. U la bynrap ruh Haba Kum ki Nongialam ngi kiew shaphrang ki jingshah bein shah kynnoh bad Shah kynthoh, ki jingshah iaroh kin don beit, hynrei ngin shim ia ki nongbein nong kynthoh Kum ka jingai jingmut bad ki jingshah iaroh Kum ki nongpyrsad mynsiem. Ha kine ki sngi ba mynta ka jingstad ka la nangkiew irat hynrei ka jingkitkhlieh ka nanghiar arsut bad ka synshar khadar ka la nangsynjor, Lada ka synshar ka khadar ka synjor ka don ka jingma ka ba khraw namar Lada ngi kren ki ia ki mat ki jura ki ba ktah ia ka Ri bad ka jaid bynriew ki shu sah ha shiteng lynti. U la kyntu ruh ba Kum ki Nongialam jong ka Nongpyndeng Unit ki dei ban long ki nongprat lynti ia ki Khun Samla ha Shnong ha thaw ba kin iaid haka lynti ba dei, wat hapdeng ka jingartatien bad ki jingduh jingkyrmen hynrei lada ki samla ki mih shabar ban leh ban kren ia kaba dei kan long ka sharak bad ka jingai jingkyrmen ia kata ka bynta ba ngi la duh jingkyrmen. Shim ia ka lyngkor ban pyndep ia la ka jong ka kamram, u synniang ba phin ai ia ka Shnong ka thaw bad ka imlang sahlang bad ngi khmieh lynti ba phin ai ka ba bha Tam ia ka Ri bad ka jaid bynriew hi baroh kawei.


0 Comment(s)

Write a Comment

Newsletter

Subscribe to our eNewsletter to get the latest updates.

Back To Top