U Bull N Lyngdoh uba ki paidbah ki tip kum u Bull u dei u President ba saw jong ka KSU. U la shimti ia ka kam President ha u snem 1983 tad haduh u snem 1990. U la bat ruh kum u Secretary General ka North East Students' Union (NERSU) hapdeng kine ki snem. 

U Bah Bull u pawkhmat bha halor ka jingiakhih pyrshah khardai ha u snem 1987 kaba la tip ruh kum ka 2nd Anti-foreigners Movement hadien ka jingiakhih pyrshah kharbangla ha u 1979 ba la lam khmat da u Bah Michael Syiem. U Bah Bull ha ki por u Bah Mike u bat kum u Disciplinary Secretary ka seng. 

Lyngba ka Indo-Nepal Treaty 1950, da ki phew hajar ngut ki Nepali ki wan tuid sha Meghalaya naduh u snem 1980 ter ter ban buhai shnong. Ynda ki la roi ki la sdang ban dakhol naphang ia ki jaka ki puta ki Khasi, ki la khang ia ki Khasi ban rung sha ki dong ba bun ma ki bad ki la bom la tied naphang ia ki Khasi ha man la ki jaka khlem da map shuh wat ia ki kynthei Khasi ba sait jaiñ ha Urkaliar, ha kaba ki la leh be-i-jot ia ki. 

Ha u snem 1987, la seng ia ka kynhun pyntriem Nepali, ka Gorkha National Liberation Front ha Shillong bad la lam khmat da u Captain Amitabh Thapa, u ex-army. U Captain Amitabh Thapa lem bad ki runar Nepali ha utei u snem ki la leit ieng habar gate jong man ki college ha Laitumkhrah ha ka por ba dang ai admission. Ki la bat lut ia ki khynnah Khasi (kynthei bad shynrang) bad tar ia ki application forms jong ki bad shah tang ia ki Nepali ban thep klas. La mih ka khubor ruh ba ki gang u Amitabh ki la rape ia kawei ka samla pule Khasi ha kyrpong ka St. Anthony's College. 

Ha kane ka por, u Bah Bull u dang shu pyndep ia ka B.Sc bad bteng ia ka LLB ha Shillong Law College. Ki samla wad klas ki la ujor sha ka KSU ba kim ioh thep klas namar ba la khang da u Captain Amitabh Thapa bad ki gang Nepali ki jong u. U Bah Bull lem bad kiwei ki dkhot ka KSU ki la tur sha Laitumkhrah bad shoh naphang ia ki gang khardai kynthup ia u Captain Thapa kiba pahara ha ki gate college. Hadien kane ki Khasi ki la ioh ban thep klas tangba ki Nepali ki la sat sia bad sdang pyntriem ia ki Khasi da kaba shoh dat naphang ia ki ha ki shnong ki thaw khamtam ha Mawprem, Mawlai, Laban area bad Nongmensong. Ki la pynkylla jubor ia ka kyrteng Nongmensong sha ka Lalchand Basti. Ki la dawa ruh ban pynkylla kyrteng ia ka Ri Bhoi Sub Division sha ka Gorkha District. 

Dei hangne ba ka KSU lyngba u Bah Bull ki la ieng rangbah ban ia khun ia kine ki poiei  pyntriem ia ka Jaidbynriew bad ka jingiakhih ka la neh haduh shi snem kynthih. Ha u 1987, khlem long skul, long trei ne long klas. 

Bun ngut ki Khasi ki la shah kem, shah pyniap bad shah set along. Ki bor shipai, CRPF bad pulit ki thom naphang ia ki Khasi. U Bah Bull u shah kem bad shah tied naphang ha ki bor sorkar. Shisien ha DC ophis, ki pulit ki thlieh pathar ia u da ki lathi tad haduh ba kan da pait ka khlieh jong u bad ka snam jong u ka lyngkien ha madan DC ophis. 

Hynrei u Bah Bull u khlem pyndem, ka jingiakhih ka iai bteng. Phet ki Nepali na Mawlai, Lower Mawprem, Nongmensong bad Ri Bhoi. Ki bor sorkar ki kput da kaba siat iap ia u Paul Biswal Makri, u dkhot ka KSU na Umrit, Ri Bhoi ha Motphran.

U Bah Bull u la ia khun ilekshon  ha u 1990 na Malki-Nongthymmai Constituency bad u la jop, hynrei hadien um treh ieng ilekshon shuh namar u la i ngiah ia ka jyrsieh politics. 

Namar ka jingshah tied shah pynshitom ha ki bor pulit, u Bah Bull um lah kyrda shuh na ki jingpang bad u la khlad noh na ka pyrthei ha ka 7 tarik u Nohprah 1994 ha ka rta ba dang lung, kata 42 snem.

Im slem ka nam ka burom u Bah Bull Nongjop Lyngdoh!!!!

29 snem mynshwa phi la ieh ia ngi, hynrei ka snam ka jong phi kan iai ud ha ngi!!!

Maitshaphrang Khlur Ka Ri!!!

Im slem KSU!!! ✊✊✊

- Published by KSU Media Unit