Ka Khasi Students' Union (KSU) North Khasi Hills District Unit ha ka 19 Rymphang 2021 ka la ioh ban pynskhem ia ki saw tylli ki shnat treikam ki ta ki long KSU Umsning Lumroman Unit, KSU Umsning Umsohlang unit, KSU Umsning Patarim unit bad KSU Umran Ñiangbyrnai Unit ki ban hap ha ka jylli treikam ka KSU Umsning circle.

Ha katei ka sngi la wan ban pyntiansmai ia ki tei ki shnat treikam da U Samla Rangbah Nongialam Lambokstarwell Marngar President ka KSU Sengkmie ha ryngkat ka jing iadon ryngkat u samla Biangbor Lyngdoh Paliar Vice-president ka KSU Sengkmie, Samla Eric Nongkynrih Assistant General Secretary KSU Sengkmie, Iashan Mukhim Assistant Organising Secretary KSU Sengkmie, Samla Ferdynald Kharkamni President KSU NKHD Unit, Samla Lambok Rymbai General secretary KSU NKHD Unit.

Lah wan pynshngaiñ ruh ha katei ka nohphai sngi da u Rocky Marweiñ, Rangbah Shnong ka Umsning Proper B.

Haba pynskhem ia kitei ki Nongkitkam ka KSU u Samla Rangbah Nongialam Lambokstarwell Marngar u la pynkynmaw kum ki dkhot ka Jaidbynriew ki dei ban ri kyndong khamtam ia ka akor ka burom Khasi bad ban iarap kyntiew lem ia ki para samla ha ki dong ki thain, imlang sahlang, kumjuh ba kim dei ban klet ia ka jingialeh ka Jaidbynriew naduh mynshwa haduh mynta kumno ban ialeh ban wanrah lyngba ki ain ba pher ba pher ban iada ia ka ri bad Jaidbynriew bad ngi dei ban shim jingkitkhlieh na bynta ka pateng ban sa wan.

U lah bynrap ruh da kaba pynkynmaw ia ki dkhot ba la len lade na bynta ki daw bah ka ri bad ka Jaidbynriew bad kyntu ruh ia baroh ki dkhot ba kim dei ban kynran dien da lei lei ruh lada ka por ka dawa na ka bynta ka lawei ba phyrnai jong ka Jaidbynriew Hynñiewtrep Hynñiewskum.

Ia ka KSU Lumroman Unit la pynskhem ia u Samla Jester Nongbet kum u President bad Eric B Mawlong kum u General Secretary, Iaka KSU Umsning Umsohlang unit la pynskhem ia u Franklin Lymphuid kum u President bad General Secretary ia u Samla Laster Nongbet, Ia u ka KSU Patarim unit lah pynkhamti ia ka kam President sha u Samla Jeadkupar Jyrwa bad General Secretary sha u Samla Steaward Ryntong bad Iaka KSU Umran Ñiangbyrnai unit la pynkhamti President ia u Jeffrey Wahlang bad General Secretary Donald Nongneng.