Ka Khasi Students' Union (KSU) NEHU Unit haka 18 tarik Nailar 2021 ka la ioh ban kynduh bad buh iaka dorkhas ha khmat u Vice Chancellor ka NEHU Prof Prabha Shankar Shukla halor ba bun ki mat jingdawa haba iadei bad ka bha ka miat jong ka skulbah NEHU hi baroh kawei.

Ka seng hakane ka jingiakynduh ka la ioh ban iathir ia shibun ki mat kiba kthah iaka skulbah NEHU bad une u khlieh ka skulbah bad ka jingiakynduh ka long kaba seisoh.

Ki mat ba ka KSU NEHU Unit ka buh ha khmat ka nehu lyngba u Vice Chancellor lyngba ka dorkhas ba la buh mynta ka sngi ki long:

1- Ban pyndap noh shisyndon ia baroh jaka thylli (posts) ki ba hap ban pyndap ha baroh ki tnat jong ka nehu lada dei ha ka liang ki nonghikai (teaching staff) lane kibym dei nonghikai (non- teaching staff) khnang ba kan nym don ka jingdkhoh ka jingtrei kam bad khamtam ban pynkhlain iaka jingtrei bad ban pynjanai shuh shuh.

2- Ban pynsted iaka jingtei iaka building ka Geology Department kaba dang shu mih shen ha Shillong Campus ban pynjanai iakane ka department bad khamtam ban dang thung shuh iaki nonghikai kiba iadei bad kane ka tnat pule (department).

3- Ban pynbha (improve) shuh shuh iaka jingpynrung (enrollment) iaki Research Scholar dakaba kyntiew kyrdan iaki Nonghikai (award promotion) lyngba ka Career Advancement Scheme (CAS) da ka ba pynsted noh ia ka jingtreikam jong ka Internal Quality Assement Cell (IQAC).

4- Ban kyntiew shuh shuh iaki University Facilities, bad ruh iaki distance education bad ruh ban pynbha shuh shuh iaka Skill Development bad vocational training bad khamtam ban ai ki guidelines ha manla ki department haba iadei bad ka National Education Policy (NEP) 2020 bad kumno ban pyntreikam iaka.

5- Ban pynlong noh iaka convocation bad ka seng ka la ioh ban ai jingmut ban pynlong iaka online convocation bad ruh ban ailad noh iaki khynnah ba kin apply noh iaki degree certificate ban kin ioh noh ban apply iaki kam ha ki ba bun ki liang, bad ruh ban ailad ban leh kham bun ki papee ban leh re-evaluation.

6- ban buh lakajong ka library iaka School of Technology (SOT) bad ruh ban kyntiew iaki jingdonkam ha ki libraries ba don ha ki department bapher bapher.

7- ban pyntikna ia ka jingiatrei lang bad ka CBI ka ba dang iaid tohkit mynta haba iadei bad ki kynrum kynram hapoh Skul bah NEHU

8- Ban thung noh shisyndon ia u Pro Vice Chancellor bad iakane ka seng kala dawa ban thung beit da u Khasi uba don ki jingka jingtip ka ba khambniah iaka rukom pyniaidkam jong ka Skul Bah Nehu bad ka kyrdan ka ba biang ha ka jinghikai bad pule dangle.

9- bad khatduh ka seng ka la ioh ban kren haba dei ban ka jingpynrung klas iaki khynnah (admission) jong u snem 2021-22 bad na ka liang ka seng ka la ioh ban ai jingmut ba ia mynta u snem katba um pat lah ban pynlong iako entrance ka nehu nalor ba la don ka 20 point ka dei pat ban pynkiew sa 10 point na bynta ki trai jylla haba thep admission bad kadaw ba pynlong iaka seng ban dawa sa 10 ka long halor ka nongrim ba khamtam ki samla ka jylla ha kum kane ka por ka long eh iaki ban ioh pule shawei bad ka NEHU kadei kaba nyngkong kaba kin ialeh ban thep, khnang ba kan buh jingeh iaki ka seng ka lah dawa ban ai iakane ka 10 point ban kan long ka jingkyrkhu iaki trai ri ka jylla.

Ka seng halor kine ki mat ba la buh kan dang iai bteng ban buddien khnang ba kin urlong bad khamtam ban long ka jingkyrkhu iaka jaidbynriew hi baroh kawei.